सय रुपैँयाभन्दा महँगो सामानका लागि भन्सार  तिर्नुपरेपछि व्यापार बढ्यो

बुटवल, भदौ ४- पैदल मार्ग हुँदै नेपाल प्रवेश गर्ने यात्रुले १ सय रुपैयाँभन्दा बढी मूल्यको सामान ल्याउँदा भन्सार महसुल तिर्नुपर्ने भएपछि नेपाली बजारमा चहलपहल देखिएको छ। यो नियमले बुटवल, भैरहवा र ग्रामीण भेगको व्यापार बढेको व्यवसायीले बताएका छन्।
गएको जेठ ८ देखि सरकारले नेपालका मुख्य भन्सारमा कडाइ गर्ने निर्देशन दिएपछि सामान्य दैनिक उपभोग्य सामग्री किन्न सीमापारि नै जाने प्रवृत्ति हटेको छ। भन्सार नाकामा गर्न थालिएको कडाइका कारण यहाँका व्यवसायीले उपभोक्ता वारि नै बजार गर्न थालेको पाएका छन्।
बुटवल ट्राफिक चोकस्थित कञ्चन स्टोर्सका सञ्चालक उपेन्द्र श्रेष्ठले व्यापारमा सुधार आउँदा व्यवसायी उत्साहित भएको बताए। ‘पहिलेभन्दा व्यापारमा सुधार आएको छ, ३० प्रतिशतसम्म व्यापार बढेको छ,' उनले भने। व्यवसायीका अनुसार धेरैजसो सस्तोका नाममा उपभोक्ता सीमावर्ती भारतीय बजारमा किनमेलका लागि गए पनि वास्तवकिता त्यस्तो छैन। भारतीय बजारमा चिनी सस्तो भए पनि अन्य कतिपय सामान नेपालभन्दा महँगो भएको उनीहरू बताउँछन्। व्यवसायीका यो भनाइसँग उपभोक्ता पनि सहमत छन्। ‘चिनी सस्तो दिएर अन्य सामानमा भारतीय व्यापारीले ठग्ने गरेका छन्,' बुटवल मिलनचोककी सावित्रा आचार्यले भनिन्।
बुटवल मुन इन्टरप्राइजेजका मोहन श्रेष्ठले भन्सारमा गरिएको कडाइलाई अझै व्यवस्थित बनाउँदै दीर्घकालसम्म जारी राख्नुपर्ने बताए। 'यसले नेपाली बजार फस्टाएको छ, अझै व्यवस्थित गर्न सके नेपाली उपभोक्ता सुनौली जान छाड्छन्,' उनले भने।
भन्सार नाकामा कडाइ गरी संक्षिप्त प्रज्ञापनपत्र लागु भएपछि राजस्व संकलनसमेत बढेको छ। दैनिक ३० देखि ४० हजार रुपैयाँसम्म राजस्व संकलन भएको भैरहवा भन्सार कार्यालयले जनाएको छ। तीन महिनायता हालसम्म २४ लाख रुपैयाँ राजस्व संकलन भएको छ।
भारतको सुनौलीलगायत सीमावर्ती भारतीय बजारमा सामान सस्तो पाइने भन्दै नेपाली उपभोक्ता ओइरो लागेर नेपाली बजारको व्यापार व्यवसाय खस्केपछि व्यापार बढाउने उद्देश्यका साथ यो नियम लागु गरिएको हो।
बुटवल उद्योग वाणिज्य संघका अध्यक्ष शंकर श्रेष्ठका अनुसार सस्तोका नाममा नेपाली उपभोक्ता सीमावर्ती बजारमा ठगिरहेका हुन्छन्, जुन कुरालाई नेपाली उपभोक्ताले अझै बु‰न सकिरहेका छैनन्। उनले संक्षिप्त प्रज्ञापनपत्र कार्यक्रमलाई प्रचार माध्यमभन्दा अझै कडाइ गरे निराश यहाँका व्यवसायी उत्साहित हुने बताए।
भैरहवा भन्सार कार्यालयका अनुसार अहिले सीमावर्ती बजार जाने उपभोक्ता संख्यामा ५० प्रतिशतले कमि आएको छ। सस्तो पाइने नाममा अर्घाखाँची, गुल्मी, पाल्पा र स्याङ्जाबाट पनि उपभोक्ता सीमावर्ती बजारमा आउँछन्।
भन्सारमा कडाइ भएपछि व्यापारीले भन्सार छलेर ल्याउने सामान आयात पनि रोकिने आशा नेपाली व्यवसायीको छ। व्यवसायी श्रेष्ठले सीमावर्ती बजारसँग प्रतिस्पर्धाका लागि भन्सार नतिरी आउने सामान आयात रोक्न पनि भन्सारले ध्यान दिनुपर्ने बताउँछन्।
उपभोक्तालाई पनि भन्सार लगाएपछि व्यापारीले पनि भन्सार नतिरेको सामान ल्याउन नपर्ने व्यवसायी बताउँछन्। नेपाली भन्सारमा कडाइ भएपछि सुनौली बजारको चहलपहल घटेको छ। सुनौली व्यापार मण्डलले केही दिनअघि 'नेपाल र भारतबीच रोटी र बेटीको सम्बन्ध' रहेको भन्दै भन्सारमा कडाइ नगर्न भैरहवा भन्सार कार्यालयमा ज्ञापनपत्र बुझाएको थियो। भन्सार कार्यालयले संक्षिप्त प्रज्ञापनपत्र कार्यक्रम व्यवस्थित गर्न छुट्टै डेस्क खडा गर्न लागेको प्रमुख भन्सार अधिकृत डिकरदेव भट्टले बताए।