नेपालमा मासिक ४ हजार ल्यापटप बिक्री

काठमाडौं । नेपालमा मासिक ४ हजार ल्यापटप बिक्री हुने गरेका छन्। वैधानिक रूपमा भित्रिएका ल्यापटपको लेखाजोखा गर्दा एयरपोर्टस्थित भन्सार कार्यालयको पछिल्लो नौ महिनामा नेपाल भित्रिएका ल्यापटपको विवरणले सो तथ्यांक देखाएको हो ।

ल्यापटपको बजार १ वर्षअघि ह्वात्तै बढे पनि अहिले यसको बिक्री स्थिर हुँदै गएको बजार विश्लेषकहरू बताउँछन्। बदलिँदो फेसनझैं कुनै ल्यापटपको पनि एक समयसम्म मात्र क्रेज रहन्छ। दिनहुँ अपडेटेड संस्करणका ल्यापटप बजारमा आउने भएकाले उपभोक्ताहरू पछिल्लो प्रविधिको हाई रेन्जको ल्यापटप किन्न चाहन्छन्।

बोकेर हिँड्न मिल्ने ताररहित प्रविधिमा आधारित कम्प्युटर हो, ल्यापटप। तर यसलाई चार्ज गर्न भने विद्युत् चाहिन्छ नै। कम स्पेसमा काम गर्न तथा लोडसेडिङको अवस्थामा पनि काम निरन्तर गर्न ल्यापटप उपयोगी छ। सबै पेसामा संलग्नहरूका लागि ल्यापटप आवश्यक भैसकेको छ, त्यसकारण पनि ल्यापटपको बजार राम्रो छ। मूल्य सस्तो हुँदै जानुले पनि ल्यापटप खरिद सबैका निम्ति सहज भएको हो ।

नेपाली बजारमा डेल एचपी, एप्पल, आईबीएम-लेनोभो, सोनी भायो, डेल, फुजित्सु, एसर, तोसिबा, एमएसआई, एचसीएल, विप्रो, एनइसी, हसी ब्रान्डका ल्यापटप पाइन्छन्। जसमा अनुमानित रूपमा डेलको ठूलो बजार छ। विज्ञहरूका अनुसार डेलले नेपाली बजारमा ५० प्रतिशत स्वामित्व राख्छ। यस्तै एचपीको २० प्रतिशतको छ भने बाँकी ३० प्रतिशत अन्य ब्रान्डको छ। नेपाली बजारमा भित्रिएका ल्यापटप ६० प्रतिशत काठमाडौं र ४० प्रतिशत काठमाडौंबाहिर बिक्री हुन्छन्। धेरै ब्रान्डका धेरै मोडलका ल्यापटप नेपाली बजारमा भित्रिएकै कारण यो बजारमा प्रतिस्पर्धा बढ्दै गएको छ, जसका कारण दिनप्रतिदिन मूल्य घट्दै छ ।