घुमुवा प्रहरी तानिए, सिआइबी टोली वीरगन्जमा
तस्करीका साथै व्यवसायीमाथि जबर्जस्ती असुलीमा आपराधिक समूहलाई संरक्षण दिइरहेको आशंकामा घुमुवा -सादा पोसाकधारी) प्रहरीको समूहलाई कारबाहीस्वरूप यहाँबाट अन्यत्र सरुवा गरिएको छ । तस्करी लाइन र अवैध असुलीमा उनीहरूको संलग्नता लगायतको समाचार सार्वजनिक भएपछि प्रहरी प्रधान कार्यालयको आदेशमा तिनलाई अन्यत्र पठाइएको हो । पहाडी जिल्लामा रहेका घुमुवा समूहलाई मध्य क्ष्ाेत्रका डिआइजी गंगा पाण्डेले काजमा वीरगन्ज भित्र्याएका थिए । प्रहरी हवल्दार मनोज यादवलाई प्रधान कार्यालयमा झिकाएको छ भने उनका दुई सहयोगी जवान मनीष सिंह र विनोद पासवानलाई मध्य क्षेत्र प्रहरी कार्यालय हेटौंडामा हाजिर गराइएको छ । अर्का घुमुवा हवल्दार गोपाल यादव १० दिनको बिदामा भएकाले सहरमै छन् । उनलाई मध्य क्षेत्रले पत्र काटेर बोलाएको डिआइजी कार्यालयका प्रशासन प्रमुख ज्ञानेन्द्र घलानले बताए । गलत काममा संलग्न रहेको उजागर भएपछि उनीहरूलाई कारबाही गरिएको घलानले कान्तिपुरलाई बताए । प्रधान कार्यालयको केन्द्रीय अनुसन्धान ब्युरो -सिआइबी) को टोलीले विवादास्पद प्रहरीको क्रियाकलापबारे अनुसन्धान गर्न यहाँ सक्रिय रहेको भरपर्दो स्रोतले जनाएको छ । तिनले छानबिन प्रतिवेदन आइजिपी रमेशचन्द ठकुरीलाई दिने छन् । अपराध नियन्त्रणका लागि गोप्य सूचना संकलन गर्न सादा पोसाकमा प्रहरी परिचालन गर्ने गरिए पनि तराईका जिल्लामा हाकिमका लागि पैसा असुली गर्न घुमुवा परिचालन गर्ने चलन छ । हाकिमलाई निश्चित रकम बुझाउने सर्तमा परिचालित हुने यस्ता घुमुवाले तस्कर, अपराधीसँग पैसा असुलेर तिनलाई संरक्षण दिने गरेका छन् । उनीहरू आफैंसमेत अपराधकर्ममा संलग्न भएको पटकपटक खुलासा भएको छ ।'घुमुवाको मुख्य काम यहाँका व्यवसायीलाई डर त्रास देखाएर हाकिमको नाममा पैसा असुल्नु हो,' वीरगन्ज उद्योग वाणिज्य संघका एक पदाधिकारीले भने, 'हामीले तिनलाई गोप्य सूचना संकलन प्रहरी मानेका छैनौं ।' अवैध कारोबार बढी हुने वीरगन्जमा तस्करसँगको मिलेमतोमा यिनीहरू हाकिमका नाममा संस्थागत चोरी पैठारीमा समेत संलग्न हन्छन् । प्रायः सादा पोसाकमा घुम्नेहरू महँगा मोटरसाइकल चढ्न रुचाउँछन् । यसअघि तीन पटक कारबाहीमा परी यहाँबाट खेदिएका विवादास्पद हवल्दार यादव पछिल्लोपटक दाङबाट क्षेत्र मिलान गरी सिन्धुली हुँदै फेरि यही भित्रन सफल भएका थिए । तस्करसँग ३ लाख रुपैयाँको मोलमोलाई गरेको फोन टेप प्रधान कार्यालयमा पुगेपछि उनी करिब एक वर्षअघि यहाँबाट तानिएका थिए । डिआइजी पाण्डेले आफ्नो पदिय हैसियत प्रयोग गरी मध्य क्षेत्रको पहाडी भेगमा सरुवा गरी काजमा उनलाई वीरगन्ज पठाएका थिए । रौतहटमा हुँदा विवादमा परी सिन्धुली सरुवा भएका गोपाल यादवलाई पनि डिआइजीले यहाँ भित्र्याएका थिए । विवादास्पद घुमुवाहरूको समूह नै सहरमा घुम्न थालेपछि व्यवसायीको समूह त्रासमा थियो । तल्लो तहलाई कारबाहीस्वरूप झिकाइए पनि अधिकृत तहका विवादास्पद प्रहरी काजमै रहेकाले यहाँका प्रहरी अधिकारी असन्तुष्ट छन् । डीआइजीले काठमाडौंबाट साथै लगेका नायब निरीक्षक अरुण उपे्रतीले अहिले पनि आकर्षक मानिएका चौकीलाई पैसा बुझाउन आउन दबाब दिने गरेको प्रहरी स्रोतले बतायो । यस्तै गण, गुल्ममा रहेका प्रहरीलाई पैसा दिएर आकर्षक चौकी र थानामा जान उनले प्रस्ताव राख्न छाडेका छैनन् । आफ्नो नामसमेत प्रयोग गरेर पैसा उठाउँदै हिँडेको थाहा पाएपछि काठमाडौंका तत्कालीन एसपी रमेश खरेलले आइजिपीलाई भनेर उप्रेतीको सरुवा गराएका थिए । त्यतिबेला उप्रेती महानगरीय प्रहरी आयुक्त कार्यालयमा डिआइजी पाण्डेसँगै कार्यरत थिए ।