इन्स्पेक्टर लोकहरि खनाललाई सिन्धुपाल्चोक सरुवा 

काठमाडौं। प्रहरी प्रधान कार्यालयको कर्मचारी प्रशासन शाखाका एसपी ठाकुर ज्ञवालीले आफ्ना निकट दुई इन्स्पेक्टरलाई आफ्नै शाखामा काजसरुवा गरेर ल्याएका छन्। एसपी ज्ञवालीले नेपालगंज तालिम केन्द्रका इन्स्पेक्टर राकेश तण्डुकार र नुवाकोटको खरानीटार चौकीका इन्स्पेक्टर परशुराम तिवारीलाई काजमा कर्मचारी प्रशासनमा भित्र्याएका छन्। त्यस्तै पोखराको बैदाम, हेडक्वार्टर हुँदै विदेश मिसनबाट भर्खरै फर्र्किएका इन्स्पेक्टर लोकहरि खनाललाई सिन्धुपाल्चोक सरुवा गरेका छन्। रक्तचन्दनलगायत तस्करीको प्रमुख नाकाका रुपमा चिनिएको सिन्धुपाल्चोकमा सरुवा पाउनु भाग्यमानीका रुपमा लिइन्छ। अपराध अनुसन्धानमा भरत जीसी एसपी हुँदा इन्स्पेक्टर रहेका एसपी ज्ञवालीले त्यतिबेलाका मित्र लेखापाल परशुराम तिवारीलाई पनि नुवाकोटको खरानीटारबाट कर्मचारी प्रशासनमा ल्याएका छन्।
एसपीको बनस्थली नजिकैको घरमा मालदार स्थानमा सरुवा हुन चाहनेहरु कोसेलीपात बोक्नेहरुको भीड लाग्ने गरेको कुरा प्रहरी सूत्र बताउँछ। उनले कर्मचारी प्रशासनमा ८ बर्षदेखि कार्यरत असई दीपक थापालाई मोलतोलका लागि खटाएको प्रहरी स्रोतले बतायो। गृहसचिव लीलामणि पौडेलको सहपाठी दाबी गर्ने एसपी ज्ञवालीले आइजीपीको निजी सचिवालयबाट पठाएको सरुवा सूची पुनः परिवर्तन गर्नेगरेको आरोप छ। उनले सचिवालयबाट पठाएको सूची पुनः आइजीलाई देखाउने र आइजीले पनि द्वैध भूमिका खेल्दै डीएसपी दीपक खरेलले दिएको सूचीअनुसार गर्नु नपर्ने संकेत गरेपछि उनले सूची परिवर्तन गर्ने गरेको प्रहरी स्रोतको भनाइ छ। निजी सचिवालयबाट आइजीले एउटा सूची पठाउने तर एसपी ज्ञवालीको कुरा सुनेपछि अर्कै कुरा गर्ने आइजीको शैलीबाट उनकै सचिवालयका अधिकृतहरुसमेत दिक्क हुन थालेका छन्। आइजी शाहको छोटो कार्यकाल प्रहरी हेडक्वार्टर घुस, कोसेलीपातबिना सरुवा बढुवा नहुने स्थिति पैदा भएपछि अन्यायमा परेकाहरुको असन्तुष्टि बढ्दै गएको छ।