तस्करलाई सहज बन्दै अरनीको राजमार्ग …… 

  रक्तचन्दन निकासीमा प्रहरीको संलग्नता

अरनिको राजमार्गको जगाती नाकाको कमजोर सुरक्षाका कारण प्रतिबन्धित रक्तचन्दन पटकपटक निकासी भएको पुष्टि भएको छ । भक्तपुर नाकाबाट छुटेको चन्दन काभ्रे र सिन्धुपाल्चोकका सुरक्षा निकायले पक्राउ गरेपछि यस्तो पुष्टि भएको हो । नाकामा खटिएका सुरक्षा अधिकृतले लापरबाही गरेको भन्दै भक्तपुर प्रहरीले एक प्रहरी नायब निरीक्षकलाई कारबाही सिफारिस गरेपछि यसको थप पुष्टि भएको हो ।
काभ्रेका प्रहरी नायब उपरीक्षक सुरेन्द्रप्रसाद मैनालीले जगाती नाका कमजोर भएकै कारण चन्दन काभ्रे भित्रिने गरेको बताए । 'गाडी राम्ररी चेक गरेको देखिंदैन, चेक गरेको भए चन्दन देखिने अवस्था थियो । जिपमा चेक गर्ने जोसुकैले पनि देख्न सकिन्थ्यो,' उनले भने । गत शुक्रबार यही नाका हँुदै गएको ६ सय किलो रक्तचन्दन काभ्रेको पाँचखाल प्रहरीले राति साढे दुई बजे नियन्त्रणमा लिएको थियो । त्यस्तै वैशाख १० गते तातोपानी र असार १७ गते कोदारी गाउँमा लुकाइराखेको १ हजार ४ सय किलो रक्तचन्दन स्थनीय प्रहरीले बरामद गरेको थियो ।

भक्तपुर प्रहरी स्रोतका अनुसार जगाती नाकाको प्रहरीसँग मिलोमतो नभई यस्तो अवैध ओसार पसार सम्भव
छैन । नाकामा काठमाडौंस्थित थानकोट चेक पोस्टले जस्तो सवारीको विवरण राख्ने समेत गरेको छैन । चार पांग्रे ठूला सवारीको मात्रै विवरण राख्ने गरेको छ । 'जगाती प्रहरीको मिलोमितोबिना अवैध सामान भित्रिने र बाहिरिने सम्भव छैन,' स्रोतले भन्यो, 'सीसीटीभी छ तर यहाँको प्रहरीको कमाउने साधन भएको छ ।'
जगाती नाकामा कडाई गरे ताथली हँुदै नालाबाट पनि यस्ता अवैध सामान निकास हुने गरेको प्रहरीको भनाइ छ । ताथली नाका पनि जगाती प्रभागकै कार्य क्षेत्रमा पर्छ । रक्तचन्दन जाने हल्ला चलेपछि केही साताअघि प्रभागकै कार्य क्षेत्र नलिन्चोकमा त्यसबाट पैसा असुल्न 'चुल्ठेमुन्द्रे' ले हुलहुज्जत गरेका थिए । त्यसमा दलहरूका भ्रातृ संगठन संलग्न थिए ।
भक्तपुर परिसरका प्रहरी उपरीक्षक नारायणसिंह खड्काले काभ्रेमा बरामद गरेको रक्तचन्दन जगाती हँुदै गएको पुष्टि भएपछि चेकजाँचमा संलग्न प्रहरी र प्रभाग प्रमुख प्रहरी निरीक्षक केशव थेवेमाथि छानबिन भइरहेको उनले बताए । 'जगाती नाकाको सुरक्षा अवस्था कमजोर छ भन्न मिल्दैन,' उनले भने, 'हामीले कडाइ गरिरहेका छौं ।' प्रहरी स्रोतका अनुसार परिसर भक्तपुरले चन्दन गएको राति चेकिङका लागि सडकमा खटिएका प्रहरी नायब निरीक्षक चन्द्र मानन्धरलाई निलम्बनका लागि महानगरीय प्रहरी आयुक्तको कार्यालयमा
सिफारिस गरेको छ । स्रोतका अनुसार सिपाही हेमराज महतो, अर्जुन पोखरेल, श्याम जंग शाह, लेखबहादुर कार्की लाई शुक्रबार नै परिसरमा तानेर अनुसन्धान गरी कारबाही प्रक्रियामा छ ।