को परेन कालो सूचीमा ? 

     उद्योगपती प्रदीपमान, प्रसिद्ध चिकित्सक बाँस्कोटा र वैद्य

श्रीमान प्रमुख कार्यकारी र श्रीमती सञ्चालक समिति सदस्य भएका कारण समस्या भोगिरहेको सेञ्चुरी बैंकका पूर्व अध्यक्ष पनि कालो सूचीमा परेका छन् । सेञ्चुरीका डेढ साता अघिसम्मका अध्यक्ष प्रदीपमान वैद्यलाई नविल बैंकको सिफारिशमा कर्जा सूचना केन्द्रले सोमवार कालोसुचीमा राखेको हो ।
वैद्य डेढ साता अघिसम्म्म बैंकका अध्यक्ष थिए, कालोसूचीमा पर्ने निश्चित भएपछि डेढ साता अघि मात्र वार्षिक साधरणसभा गरेर उनी आफैले अध्यक्षमा बस्न अस्वीकार गरेका थिए । वैद्यलाई कालोसूचीमा राख्नका लागि नविल बैंकले सिफारिश गरेको हो । वैद्यले अप्रत्यासित रुपमा अध्यक्ष छाडेपछि सेञ्चुरीमा अहिले अध्यक्ष पद खाली छ ।
बैंकले वैद्य सञ्चालक रहेको बीएण्डबी हरिसिद्धी मेडिकल कलेज एण्ड टिचिङ हस्पिटलले लिएको २० करोड ऋणमध्ये १४ करोड रुपैयाँ चुक्ता नगरेपछि  कालोसूचीमा राखेको स्रोतले जानकारी दियो । बैंकको सिफारिशमा कर्जा सूचना केन्द्रले ग्वाँर्कोको बीएण्डबी अस्पतालका दुई सञ्चालक अशोककुमार बाँस्कोटा र जगदिशलाल वैद्यलाई पनि कालोसूचीमा राखेको छ ।

हरिसिद्धीले हर्यो ख्याती : बीएण्डबीका चिकित्सक अशोक बाँस्कोटा, उद्योगी प्रदीपमान वैद्य र अर्का डाक्टर जगदिशलाल वैद्य

यसैगरी प्रदीपको लगानी भएको विजयदीप इन्भेष्टमेन्ट कम्पनीलाई पनि कर्जा सूचना केन्द्रले कालोसूचीमा राखेको छ । वैद्यको यही कम्पनीले लगानी गरेको विजयदीप ल्यावरोटरीले नेपालमा विभिन्न औषधीहरु उत्पादन गर्दछ ।
यही ऋणका लागि केन्द्रले बाबुकाजी श्रेष्ठ, नविन श्रेष्ठ, प्रभुकुमारमान प्रधानलाई पनि कालोसूचीमा राखेको छ । बीएण्डबी बाट ऋण उठाउनका लागि बैंकले अढाइ वर्षदेखि फ्लोअप गरिरहेको थियो । अढाइ वर्षदेखि फ्लोअपमा थियौं, कर्जा तिर्न आउनका लागि ३५ दिने सूचना पनि प्रकासित गरेका हौं, धैयर्ताको बाँध टुटेपछि कालोसूचीमा राख्न सिफारिश गरेका हौं, स्रोतले भन्यो ।
राष्ट्र बैंकबाट समेत दवाव दिएपछि नविल बैंकले वैद्य लगायतको समूहलाई कालोसूचीमा राख्न सिफारिश गरेको हो । नविल यो ऋणका लागि गत आर्थिक वर्षमै शतप्रशित नोक्सानी व्यवस्था गरेको थियो ।
बीएण्डबी हरिसिद्धी मेडिकल कलेज एण्ड टिचिङ हस्पिटलमा अप्रत्यक्ष रुपमा एनबी समूहको समेत संलग्नता छ । हरिसिद्धीमा एनबी समूहसँग जग्गा थियो, यही जग्गामा मेडिकल कलेज खोल्नका लागि पहिले योजना बनेको हो । एनबी समूहसँगको संलग्नतामा नविल बैंकमा अमृतचरण श्रेष्ठ जिएम तथा क्रेडिट अफिशर हुँदा यो ऋण सुटुक्क दिइएको थियो । त्यतिवेला बैंकमा अनिल शाह प्रमुख कार्यकारी अधिकृत थिए तर उनी अमेरिकामा गएको बेला यो ऋण दिइएको हो स्रोतले भन्यो ।
बीएण्डबीलाई यता ऋण दिएपछि औषधी उद्योग खोल्नका लागि नविलका अध्यक्ष सत्येन्द्रप्यारा श्रेष्ठ, स्वास्थ्यसचिव प्रविण मिश्रकी श्रीमतीको कम्पनीलाई उनबी बैंकमा ऋण दिइएको थियो । पछि ग्लोबल बैंकबाट अनिल ज्ञवालीलाई नविल बैंकमा प्रमुख कार्यकारी अधिकृत बनाएर ल्याएपछि कामु सिइओ बनेका अमृतचरणले राजिनामा दिएका थिए ।
उनले राजिनामा दिएको केही दिनपछि नै पुरानो साँठगाँठ अनुसार एनबी समूहको बहुमत सेयर भएको एनसीसी बैंकमा अमृतचरणलाई सिइओ बनाइएको थियो । उता २०६७ चैत ११ गते मात्रै सञ्चालनमा आएको सेञ्चुरीको समस्या भने बल्झिंदै जान थालेका छन् । राष्ट्र बैंकले असार अन्तिम साता जारी गरेको एकीकृत निर्देशिकाले बैंकका सिइओ गणेशकुमार श्रेष्ठ वा सञ्चालकका रुपमा काम गरिरहेकी श्रेष्ठकी श्रीमती उमाकुमारी श्रेष्ठमध्ये एक जनाले राजिनामा दिनुपर्दछ ।

राणाका बाउछोरा पनि कालोसूचीमा

सेञ्चुरी बैंकमा मात्र होइन समस्या कृमारी बैंकमा पनि सिर्जना भएको छ । बैंकका दुई सञ्चालक नुरप्रताप जवरा र अमिरप्रताप जवरालाई पनि कर्जा सूचना केन्द्रले कालोसूचीमा राखेको छ । यी दुई सञ्चालकलाई सिटिजन्स बैंकले ऋण चुक्ता नगरेको आरोपमा कालोसूचीमा राख्न सिफारिश गरेको हो । नुरप्रताप बाबु हुन् भने अमिर छोरा ।

सिटिजन्स बैंकबाट गाडीको व्यापारका लागि लिएको ऋण राणाको कम्पनी क्युव इन्टरनेशनललाई चुक्ता नगरेपछि कालोसूचीमा राख्न सिफारिश गरिएको हो । सिटिजन्स बैंकले क्यव इन्टरनेशनलका नाममा कर्जा तिर्न आउन ३५ दिने सूचना जारी गर्दा राणा बाबुछोराले पत्रिकाबाट अर्को सूचना जारी गरेर प्रतिवाद गरेका थिए ।
कुमारी बैंकमा नुरप्रतापको साढे छ प्रतिशत अर्थात नौ करोड ६५ लाख रुपैयाँको संस्थापक सेयर छ भने अमिरको नाममा ५.०६ प्रतिशत अर्थात सात करोड ५१ लाख रुपैयाँ बराबरको सेयर छ । यसबाहेक राणाहरुको कम्पनी युनिभर्सलले गोल्डस्टार जुत्ताको उत्पादन र बजार प्रवद्र्धन गर्दै आएको छ । अब नुरप्रताप र अमिरले कुमारी बैंकको सञ्चालक पद छाड्नुपर्दछ । कर्जा सूचना केन्द्रले कालोसूचीमा राखेपछि कुनै पनि बैंकको अध्यक्ष तथा सञ्चालक हुन बन्देज लाग्छ । ऋण तिरेर कालोसूचीबाट हटे पनि त्यसको तीन वर्षसम्म कम्पनीको सञ्चालक हुन पाईंदैन ।