यी हुन् सक्कली बिल प्रयोग गरी नक्कली कारोबार गर्नेहरू ..........................................
रोशन कार्की
काठमाडौं, साउन १८ । मूल्य अभिवृद्धि कर (भ्याट) तिरेको सक्कली बिल खरिद गरी नक्कली सामानको आयात÷निर्यात गर्ने एक दर्जनभन्दा बढी व्यापारिक फार्महरूको पहिचान भएको आन्तरिक राजस्व विभागले जनाएको छ । आफ्नो नाममा कुनै पनि फार्म नखोली भरिया र कामदारको नाममा खोलिएका दर्जानौं अवैध व्यापारिक फार्मबाट भन्सार कारोबार गरिरहेको अनुसन्धानमा खुल्न आएको छ ।
आफ्नो नाममा कुनै पनि व्यापारिक फार्महरू कतै आधिकारिक रूपमा दर्ता नभएको र केही गरी सामान बरामद भए पनि आफू कानुनी रूपमा कारबाहीबाट उम्किन तथा भ्याट फिर्ताका लागि पनि सक्कली भ्याट बिल खरिद गर्दैै आएको विभाग स्रोतले जनाएको छ ।
आन्तरिक राजस्व विभागबाट प्राप्त विवरणअनुसार हालसम्ममा सबैभन्दा बढी सिन्धुपाल्चोकको तातोपानी भन्सार नाकाबाट कारोबार गर्ने फार्म छन् । यसरी अवैध रूपमा बिल खरिद गरी वास्तविक भ्याट र कर छली गर्नेहरूमा एस केजे इन्टरनेशनल विजनेश प्रालि, कान्तिपुर विजनेश ग्रुप, गोसाइँकुण्ड इन्टरनेशनल विजनेश प्रालि, सिन्धु इन्टरनेशनल विजनेश प्रालि, जुगल इन्टरनेशनल प्राइजेज र अरनीको ग्रुपलगायत छन् ।
पहिलो चरणको अनुसन्धानबाट चीनको स्वशासित क्षेत्र तिब्बतको खासाबाट ब्राण्डबिनाका सामान अत्यधिक रूपमा ल्याउने तथा भन्सार राजस्व छली गर्ने र ल्याउने समूह रहेको खुल्न आएको विभागले जनाएको छ । कुनै ब्राण्ड उल्लेख नभएको सामान ल्याएर व्यापारिक फार्महरूले नेपाली बजारमा अन्तर्राष्ट्रिय ब्राण्डको स्टिकर टाँसी खुला रूपमा बिक्री गर्दै आएका छन् ।
यसरी अवैध कारोबार गर्ने फार्मले ठूला कम्पनीसँग ७ प्रतिशत कमिसन दिएर सक्कली भ्याट बिल खरिद गर्ने गरेका छन् । ठूलो परिमाणमा सामान आयात गर्ने र उत्पादन गर्नेहरूले सामान कतै दर्ता नभएका कम्पनीमार्फत बिक्री गर्ने गरेको खुल्नआएको विभाग स्रोत बताउँछन् ।
ती कम्पनीले सामानबापतको रकम आयात वा उत्पादनकर्तालाई नभई दास्रो कम्पनीलाई नगदै दिने गरेको पाइएको आन्तरिक राजस्व विभागका एक अधिकारीले बताए । नाम उल्लेख नगर्ने सर्तमा ती अधिकारीले दिएको जानकारीअनुसार आयातकर्ताले दोस्रो कम्पनीसँग बैंक संयन्त्रबाटै पैसा लिने गरेको र यस्तो कारोबार मिलाइदिने कार्यमा संलग्न एकाउन्टेन्ट राजेश अग्रवाल नामका व्यक्ति फरार छन् ।
राजेन्द्रकुमार श्रेष्ठ, विष्णुबहादुर खत्री, रोशनबहादुर थापा, नवीन थापा, गणेश भण्डारी, सुमन खत्री, गोपाल श्रेष्ठ, निमफुजो शेर्पा, नीलकण्ठ चौलागार्इंलगायतले नक्कली कारोबार गर्दै आएका छन् । उनीहरूले आफ्नो व्यापारिक कारोबारका बारेमा योजना बनाउन अवैध रूपमा खोलेका कार्यालय अधिकांशको काठमाडौंको न्यूरोडको रञ्जनागल्ली, महाबौद्ध सीतापाइला, स्वयम्भू, बालाजु, चावहिल, कोटेश्वर, नया“ बानेश्वर, भक्तपुरलगायतका स्थानमा छन् । यसरी अन्यको नाममा खोलिएको फार्ममाबाट आयात गरिएका सामान महाबौद्धका होलसेल पसलमा बिक्री गरिन्छ ।