हिमालय सीमापार वाणिज्य संघमा अनियमितता !!!

 श्रेष्ठ र खत्रीको ठगी प्रकरणलाई सरकारी निकायले चासै नदिएपछि हामीबाट रकम उठाउँदै उनीहरू आर्थिक लुटमा सक्रिय भएका हुन्, उनीहरू अहिले अर्बौं सम्पतिका मालिक बनेका छन्

ः व्यापारी !!

हामीले राम्रो काम गरेकोले इष्र्यालुहरूले यस्तो आरोप लगाएका हुन् ः खत्री र श्रेष्ठ !!!



नेपाल हिमालय सीमापार वाणिज्य संघमाथि व्यापारीहरूको पैसा उठाएर आर्थिक अनियमितता गरेको आरोप लागेको छ । संघले विगत १२ वर्षदेखि लगातार व्यापारीहरूसँग उनीहरूको हकहितका लागि भनेर उठाएको २० करोड रुपैयाँभन्दा बढी रकम हिनामिना गरेको आरोप छ । संस्था स्थापनाको करिब १५ वर्ष अवधिमा खासादेखि राजधानीसम्म चल्ने कन्टेनरबाट करिब २५ करोड रुपैयाँ संकलन भएको अनुमान छ ।
संघले काठमाडौंको बुद्धनगरमा बनाएको करिब ६ करोड रुपैयाँ बराबरको भवनबाहेकका सम्पत्तिको बारेमा शंका रहेको व्यापारीहरूले बताएका छन् । संघमा करिब १५ वर्षसम्म एकछत्र नेतृत्व दिएका निवर्तमान अध्यक्ष दुर्गाबहादुर श्रेष्ठ र नेपाल उद्योग वाणिज्य महासंघका केन्द्रीय सदस्य विष्णुबहादुर खत्रीले नै संस्था चलाएको भन्दै संघका अरु पदाधिकारी बोल्न मानेनन् । तर, श्रेष्ठ र खत्रीहरूकै मिलेमतोमा रकम हिनामिना भएको गुनासो पीडित व्यापारीको छ ।
स्थापनाकालमा प्रतिकन्टेनर १ हजार रुपैयाँका दरले रकम उठाउने गरे पनि तीन वर्षपछि बढाएर १ हजार ५ सय बनाइएको स्थानीय व्यापारी नीमफुन्जु शेर्पाले बताए । तीन वर्षसम्म १ हजार ५ सयका दरले रकम असुलेपछि फेरि त्यसलाई सच्याउँदै दुई वर्षसम्म १ हजारका दरले रकम असुलिएको शेर्पाको भनाइ छ । त्यसपछि दुई वर्षजति ५ सयका दरले रकम असुले पनि संस्थाको भवन बनाउने भन्दै पुनः १ हजार ५ सयकै दरले उठाइएको अर्का व्यापारी बहादुर शेर्पाले बताए ।
स्रोतका अनुसार संघले हाल सामान लोड हुने चिनियाँ भूभागबाटै १ हजार ६ सय ५० रुपैयाँ उठाउने गरेको छ । करिब १२ वर्षसम्म व्यापारीबाट लगातार रकम उठाएको संघले आफ्नो व्यापार व्यवसाय सञ्चालनकै लागि भनेर काठमाडौंको बुद्धनगरमा १८ आना जग्गा किनी पक्की ६ तले भवनसमेत बनाएको छ । भवनको अधिकांश भाग श्रेष्ठ र खत्रीका आफन्तका संस्था र आसेपासेहरूलाई भाडामा लगाइएको एक पदाधिकारीले बताए ।

तत्कालीन संघका अध्यक्ष दुर्गाबहादुर श्रेष्ठ उर्फ रुद्र.............उनी र विष्णु खत्रीमाथी अनियमिकताको आरोप लागेको छ

“श्रेष्ठ र खत्रीको ठगी प्रकरणलाई सरकारी निकायले चासै नदिएपछि हामीबाट रकम उठाउँदै उनीहरू आर्थिक लुटमा सक्रिय भएका हुन्,” बहादुरले भने, “आफूखुसी अवैधानिक तवरले रकम उठाउन थालेपछि श्रेष्ठ र खत्री अर्बौं सम्पतिका मालिक बनेका छन् ।”
तातोपानी भन्सार कार्यालयको तथ्यांकअनुसार तातोपानी नाकाबाट दैनिक सरदर ६० देखि ७० वटा कन्टेनर राजधानी भित्रिने गर्छन् । “सिजनमा यसको संख्या निकै बढी भए पनि औसतमा ६० देखि ७० को संख्यामा भन्सारको सिल लगाएर कन्टेनर राजधानी जान्छन्,” भन्सार अधिकृत गोपाल भट्टराई भने, “यो अनुपात विगत १० वर्षदेखिको हो ।”
संघका वर्तमान अध्यक्ष नीलकण्ठ चौलागाईंका अनुसार करिब ६ करोड लागतमा बनाइको भवनबाहेक संस्थाको नाममा एक पैसा पनि छैन । “अझै डेढ करोड ऋण तिर्न बाँकी छ,” उनले भने, “म भर्खर संस्थामा आएकोले अरु कुरा केही थाहा छैन ।”
भवन निर्माणका लागि रकम नपुगेपछि १६ भन्दा बढी व्यापारीबाट स्वेच्छिक रूपमा हालै १० देखि ५० हजार रुपैयाँसम्म उठाइएको दाबी चौलागाईंको छ । यसले पनि नपुगेपछि डेढ करोड रुपैयाँ ऋण लिइएको उनले बताए ।
संस्थाबाट प्रशस्त रकम असुलेपछि मात्रै श्रेष्ठले राजीनामा दिएको आरोप व्यवसायीको छ । उनीलगत्तै उपाध्यक्ष विष्णुबहादुर खत्रीले पनि राजीनामा दिएका छन् । यद्यपि उनको राजीनामा स्वीकृत नभएको संघले जनाएको छ । खत्री र श्रेष्ठले भने आफूहरूले राम्रो काम गरेकोले इष्र्यालुहरूले उक्त आरोप लगाएको दाबी गरे । “मैले पाँच वर्षसम्म कोष अध्यक्ष सम्हाल्दा कुनै कमजोरी भएन तर पछि केही रकम हिनामिना भएको हुनसक्छ,” खत्रीले भने ।