चैतमा हुने निर्वाचन प्रचारप्रसारमा भाष्कर र प्रदिपको प्रतिस्पर्धा
रोशन कार्की
काठमाडौं । व्यवसायीहरुको छाता संगठन नेपाल उद्योग वाणिज्य महासंघमा पछिल्लो समयमा आएर गुठ र उपगुठमा विभाजन भई व्यवसायीक कामकाज ठप्प भएको छ । निवर्तमान अध्यक्ष चण्डी ढकालको कार्याकालबाट सुरु भएको अन्तरद्वन्द्ध बर्तमान अध्यक्ष सुरज बैंद्यसम्म आइपुग्दा छताछुल्ल भएको छ ।  सरकारले गराउने भनेको यस पटकको संविधानसभा निर्वाचनमा कुनै पनि दललाई चन्दा नदिने घोषणा गर्न एकजुट भएका उद्योगी व्यवसायीहरू आफ्नै संगठनको वार्षिक साधारण सभा तथा नयाँ कार्यसमितिको चयन हुने भएपछि महासंघको राजनीतिकै कारण ४ समूहमा विभाजित भएका छन् ।
महासंघको चुनाव आउन सात महिना बाँकी रहँदा महासंघका बरिष्ठ व्यवसायीहरुलाई चुनाव लागेका कारण महासंघमा विवाद र गुटबन्दी सुरु भएको छ । महासंघको विधान अनुसार २०७० चैत मसान्तभित्रै गरिसक्नु पर्ने महासंघको निर्वाचन आउन अब सात महिना बाँकी रहेको छ । यस पटकको निर्वाचन सर्वसम्मत कि प्रतिस्पर्धा भन्ने बहस पनि एक तर्फबाट भइरहेको छ भने अर्कोतर्फ आफ्नो पक्षमा नेतृत्व हत्याउनकालागि दरो कसरत समेत भएको महासंघको एक उच्च स्रोतले जनाएको छ ।
महासंघबाट प्राप्त जानकारी अनुसार वर्तमान अध्यक्ष बैंद्यको कार्यशैलिप्रति पूर्वअध्यक्षहरु रुष्ट भएका छन् भने अर्कोतर्फ बैंद्य समूहले नै पुन ः नेतृत्व लिने तयारीका साथ समूहनै तयार गरेको जनाएका छन् । महासंघको आगामी अध्यक्षका उम्मेदवारका रुपमा हाल ४ जना पदाधिकारीहरू बढी चर्चामा रहेका छन् । सो चर्चाअनुसार हाल बरिष्ठ उपाध्यक्ष बैंद्य समूहका भाष्करराज राजकर्णिकार र आजाद श्रेष्ठ समूहका उपाध्यक्ष प्रदिपजंग पाण्डे रहेका छन् भने पुन ः निवर्तमान अध्यक्ष कुशकुमार जोशी र पूर्वअध्यक्ष तथा बिशिष्ट सदस्य चण्डीराज ढकाल भावी अध्यक्षका दावेदारका रुपमा चर्चामा आएका छन् । सवैभन्दाबढी अध्यक्षको रुपमा आफ्नो विश्वासिलो मतदातालाई भित्रभित्रै प्रचारप्रसारमा लगाएका छन् ।  आफ्नो संगठन र पकडमा आँच आउन नदिन र सुरक्षा गर्न सक्रिय भएर लागेका छन् ।

 वाणिज्य महासंघमा गुटैगट

यसैगरी दोस्रो नम्बरमा श्रेष्ठ समूहबाट उपाध्यक्ष जितेका पाण्डे भाष्करराजको पक्कड क्षेत्रलाई भत्काउन पूर्वअध्यक्ष चण्डीराज ढकाललाई साथमा लिएर चुनाबी योजना बनाएर लागि परेका छन् । चुनावी प्रचारमा हिंडेका चण्डीले आफैं उम्मेदवार बन्ने कुरा आफ्नो विश्वासिलो पात्रहरुसंग गरेपछि ढकालबाट पाण्डेलाई धोका पुग्ने सम्बन्धित व्यवसायीहरुले बताएका छन् ।
चण्डी, कुश, भाष्कर, प्रदीपले महासंघको आगामी नेतृत्वका लागि चलखेल गर्न थालेको विषयलाई भने कतिपय वरिष्ठ उद्योगी–व्यवसायीले भने सो प्रकृया गलत भएको बताएका छन् । एक बरिष्ट व्यवसायीले नाम नलेख्ने सर्तमा भने,‘हाम्रो सस्थाभनेको पद हत्याउनकालागिमात्र देखिन पुगेको छ, चैतमा हुने निर्वाचनमा अहिलेदेखि चुवाबकालागि अभियान सञ्चालन गरिनु दुःखत विषय हो ।’ उनले यो अस्वस्थ्य प्रतिस्पर्धाले सिंगो व्यवसाय धराशायी हुने बताए । 
हाल महासंघ हाल ४÷५ ध्रुवमा विभाजित रहेको छ । महासंघका पूर्वअध्यक्षहरू नै चार गुटमा विभाजित देखिन्छन् । महासंघभित्र बढेको धु्रवीकरणले संस्थागत विकास र व्यवसायिक एकतामा इतिहासमै नभएको क्षति पुग्ने व्यवसायीहरुको भनाई रहेको छ । यसले गर्दा महासंघले हासिल गरेका उपलब्धिहरूले संस्थागत हुन पाएनन् भन्ने व्यवसायीहरूको गुनासो कसैले पनि सम्बोधन नगरी अर्को चुनावको तयारीमा लागेकाले पनि आलोचना भएको छ । महासंघभित्रको अनेकताका कारण वर्षौंवर्षदेखि कर समस्याबाट पीडित उद्योगी–व्यवसायीहरूलाई प्रभाव पार्ने ‘मिसम्याच’ आव २०७०÷०७१ को बजेटले सम्बोधन गरेतापनि महासंघको यो उपलब्धि ओझेलमा परेको व्यवसायीहरू बताउँ छन् । महासंघभित्रका महारथीहरूमा देखापरेको विभाजनका कारण दुरगामी प्रभावका उपलब्धिहरू समेत व्यवसायीहरूले सहज रुपमा ग्रहण गर्न नसकेको अवस्था रहेको छ । विभिन्न कालखण्डको नेतृत्व र हालको महासंघको नेतृत्वको जोडबलले हासिल भएका व्यवसायिक उपलब्धिहरू छायाँमा परेका छन् । महासंघको नेतृत्व एक ढिक्का भएर जिम्मेवार र सामाजिक दायित्व बहन गर्नुपर्ने संक्रमणको घडीमा महासंघका जिम्मेवार मानिएका पूर्व अध्यक्षहरू चार चिरामा विभाजित हुनाले यसको असर आगामी निर्वाचनमा पर्ने निश्चित भएको छ ।
प्राप्त जानकारी अनुसार पूर्व अध्यक्षहरू महेशलाल प्रधान, रविभक्त श्रेष्ठ र विनोदबहादुर श्रेष्ठको एउटा गुट क्रियाशील रहेको छ । पद्मज्योति, आनन्दराज मुल्मी र प्रदीपकुमार श्रेष्ठको अर्को अलग गुट सक्रिय छ । चण्डीराज ढकाल, कुशकुमार जोशीको अलग अलग गुटमा रहेका छन् । यस अगाडिनै विनोद चौधरी महासंघको असहमति जनाउदै अलग्गै व्यवसायिक संगठन स्थापना गरेर छुट्टी सकेका छन् ।   निजी क्षेत्रको छाता संगठनको छवि र प्रतिष्ठामा धक्का पुगेको छ ।