चीनले लार्चामा सुक्खा बन्दरगाह बनाइदिने

१४ भदौ, काठमाडौँ । चिनियाँ सरकारले सिन्धुपाल्चोक जिल्लाको लार्चामा यसै वर्षदेखि सुक्खा बन्दरगाहको निर्माण गर्ने भएको छ । उक्त बन्दरगाह सञ्चालनमा आएपछि तातोपानी नाकाबाट हुने चीनसँगको व्यापार वृद्धि तथा सामान ढुवानी सस्तो हुने जनाइएको छ । चीन सरकारले रु.२५ करोडको लागतमा निर्माण गरिदिने उक्त बन्दरगाहको सम्पूर्ण कार्य काम थालेको साढे दुई वर्षपछि पुरा हुने नेपाल इन्टरमोडल यातायात विकास समितिका कार्यकारी निर्देशक शरदविक्रम राणाले राससलाई बताउनुभयो । लार्चामा बन्दरगाह निर्माण गर्न तीन वर्षअघि सम्भाव्यता अध्ययन भएको थियो । लार्चामा निर्माणकार्य प्रारम्भ भएपछि रसुवामा पनि त्यस्तै बन्दरगाह चीनले बनाइदिने प्रतिबद्धता व्यक्त गरेको कार्यकारी निर्देशक राणाले जानकारी दिनुभयो । खासामा मालसामान भण्डारण गरेर तातोपानीबाट आयात गर्नुपर्दा नेपाली उद्यमी-व्यवसायीले कठिनाइ झेल्नु परेको छ । साथै, कोदारी राजमार्गमा मालवाहक सवारीसाधनको चाप बढेपछि लार्चामा त्यस्तो बन्दरगाह निर्माण गर्न सरकारले चीनसँग आग्रह गरेको हो । लार्चामा बन्दरगाह बनेपछि भीमकाय चिनियाँ मालवाहक कन्टेनर सोझै लार्चा आउने उल्लेख गर्दै श्रीराणाले पाँच सय रोपनी क्षेत्रफलमा बन्ने उक्त बन्दरगाहमा एकपटकमा दुई सय कन्टेनर राख्न सकिने जानकारी दिनुभयो । चीनसँगको नेपालको व्यापार तातोपानी नाकाबाट हुँदै आएको छ । लार्चामा बन्दरगाह बनेपछि द्विपक्षीय व्यापारको मात्रा विस्तार हुने अपेक्षा गरिएको छ । चीनले चार सय नेपाली उत्पादनलाई भन्साररहित बजारसम्मको पहुँच उपलब्ध गराए पनि नेपालले चीनसँग ठूलो व्यापार घाटा बेहोर्दै आएको छ । व्यापार तथा लगानी प्रवर्द्धन केन्द्रका अनुसार अघिल्लो आर्थिक वर्षमा नेपालले रु. ५५ करोडका सामग्री निर्यात गरेको थियो भने चीनबाट रु. ३८ अर्ब २२ करोडका मालसामान आयात गरेको थियो