अवैध कारोबार र तस्करी रोक्ने एसपीको एक्कासी सरुवा

पछिल्लो समय चितवनमा अवैध कारोबार र तस्करी नियन्त्रण गरेका कारण चर्चामा रहेका चितवनका प्रहरी प्रमुख रबिन्द्र शर्मालाई शक्ति केन्द्रको दवावमा शुक्रबार प्रहरी प्रधान कार्यालयमा तानिएको छ । उनी साढे २ महिना अघि झापावाट चितवनमा सरुवा भएर आएका थिए  पछिल्लो पटक गत साता भएका दुई छुट्टाछुट्टै हत्याको घटनामा संलग्नहरुलाई कारबाही नगर्न दवाव दिंदै गरेको समूहले उनलाई एक्कासी सरुवा गरेको हो । हत्या छानविनकोक्रममा मुख्य अभियुक्तलाई उम्काएर अन्यलाई फसाउने षडयन्त्रमा रहेको शक्ति केन्द्रको दबाब स्वीकार नगरेपछि उनलाई सरुवा गरिएको स्रोतको भनाइ छ । पछिल्ला दुई हत्याकाण्डको अनुसन्धान गर्दै रहेका एसपीलाई एकाएक सरुवा गरिएपछि मुख्य अभियुक्तहरु उम्काउन चलखेल भन्दै चितवनमा आसंका बढेको स्रोतको भनाई छ ।  उनको ठाँउमा शुक्रवार नै प्रहरी प्रधान कार्यालयवाट एसपी खिनुप्रसाद आचार्यलाई पठाइएको छ । सांघातिक आक्रमणवाट नारायणी यातायात समितिका मजदुर सन्तोष श्रेष्ठको मृत्यु भएपछि कुटपिटमा संलग्नलाई कारबाहीको माग गर्दै लगातार दुई दिनदेखि बन्द गरिएको अवस्थामा नयाँ एसपी आएका छन् । 'जिल्लामा अबैध धन्दा कडाइ गरेपछि रन्थनिएको समुहले सरुवा गरायो,'  एसपी शर्माले भने, 'चितवनमा प्रहरीलाई नियम अनुसार काम गर्न नदिने समूह निकै शक्तिशाली रहेछ । प्रहरीको हातखुट्टा बाँधेर काम गर भन्ने गिरोह शक्तिशाली छ । प्रधान कार्यालयमा बोलाएपछि जानै पर्‍यो ।'चितवन, भाद्र १६ -