चौधरी गु्रपको सोल्टी विस्कुटभित्र बालुवा भेटियो

काठमाडौं । मुलुककै ठूलो प्रतिष्ठित व्यापारिक घराना चौधरी ग्रुप अन्तर्गत रहेको पशुपति विस्कुट उद्योगद्वारा उत्पादित एक विस्कुटमा बालुवा मिसिएको अवस्थामा उपभोक्ता माँझ बिक्रि वितरण भइरहेको छ ।
दशौं लाख उपभोक्ताले विश्वास गरिएको भन्दै चौधरी ग्रुपको लोगो राखेर बजारमा बिक्री वितरण हुँदै आएको पशुपति डाईट एण्ड फुड प्रा.लि.द्वारा उत्पादित सोल्टी साल्टेड बिस्कुटमा यस्तो बालुवा भेटिएको हो । जनसमाजलाई प्राप्त नमुना बिस्कुटमा समेत बालुवा फेला परेको छ । डिल्लीबजारका एक पसलबाट खरिद गरिएको ब्याच नं १० को सेप्टेम्बर २०११ मा बनेको मिति उल्लेख गरिएको बिस्कुटभित्र मसिना माटो जस्तै पदार्थ र बालुवा फेला भेटिएको हो ।
चौधरी ग्रुप अन्तर्गत बसन्त चौधरीको लगानीमा सञ्चालित पूर्वी नेपालको दुहवी, सुनसरीमा कारखाना रहेको उक्त काम्पनीद्वारा उत्पादित विस्कुटभित्र लामो समयदेखि यसरी नै बालुवा मिसिएको गुनासो आइरहेको उपभोक्तावादी संस्थाले जानकारी दिएका छन् । यसरी अखाद्य पदार्थ मिसाएर बिक्री वितरण गरिनु गलत रहेको उपभोक्तावादी संस्था राष्ट्रिय उपभोक्ता मञ्चका अध्यक्ष प्रेमलाल महर्जन बताउनुहुन्छ ।
जनसमाजसँग कुरा गर्दै उहाँले भन्नुभयो ‘बिस्कुटमा बालुवा भटिएकै भए उपभोक्ता संरक्षण ऐन २०५४ र खाद्य ऐन २०२३ अनुसार तत्काल कारवाही हुनु पर्दछ ।’ विस्कुटमा बालुवा भेटिएको विषयमा चौधरी ग्रुप अन्तर्गत बसन्त चौधरीको खिचापोखरीको कार्यालय पटक पटक सम्पर्क गर्दा पनि कोही सम्पर्कमा आएनन् ।