महानिर्देशकको सरुवामा ५० लाख घुस

रोशन कार्की 

काठमाडौं, चैत ९ । 

तत्कालिन मन्त्रालय सरुबा गरिएका महानिर्देशक भट्टराई

श्रम तथा यातायात व्यवस्थामन्त्री सरिता गिरीले वैदेशिक रोजगार व्यवसायीहरूका रुचि र संलग्नतामा घुस लिएर वैदेशिक रोजगार विभागका महानिर्देशक पूर्णचन्द्र भट्टराईलाई सरुवा गरेको आशंका प्रधानमन्त्री कार्यालयले गरेको छ । व्यवसायीहरूको चाहना अनुसार केही कम्पनीलाई श्रम स्वीकृति नदिएको अभियोगमा मन्त्री गिरीले महानिर्देशक भट्टराईलाई ६ महिनाअघि हटाएर मानबहादुर विकलाई महानिर्देशक बनाएकी थिइन् । केही व्यवसायी कम्पनीको इच्छा अनुसार भएको उक्त फेरबदलीमा मन्त्री गिरीलाई ५० लाख रुपियाँ हात परेको भन्ने सूचना पुगेको प्रधानमन्त्री कार्यालय स्रोतले जनाएको छ । प्रधानमन्त्री डा. बाबुराम भट्टराईले त्यस प्रकरणमा आर्थिक चलखेल भएको सूचना पाएपछि मन्त्री गिरीसँग बुधबार स्पष्टीकरण सोध्दै राजीनामा दिन निर्देशन दिएका थिए । ‘मेनपावर कम्पनीहरूका सञ्चालकले चन्दा संकलन गरि ५० लाख रुपैयाँको थैली श्रममन्त्रालयमा बुझाएर सरुवा गरेको भन्ने सुनिएको छ, यो कुरा प्रधानमन्त्रीज्यूकहाँ पनि पुगिसकेको छ,’ श्रम मन्त्रालय स्रोतले हिमालय टाइम्ससँग भन्यो । महानिर्देशकका रूपमा भट्टराई विभागमा आएपछि उनले ठूला मेनपावर कम्पनीको फाइल नियमसंगत बनाउन तथा कानुन अनुुसार फाइलको कारबाही प्रक्रिया अघि बढाउन निर्देशन दिएका थिए । आफ्नो स्वार्थ अनुकूल भट्टराईले काम नगरेपछि त्यसैलाई बहाना बनाएर ती व्यवसायीले नयाँ महानिर्देशक ल्याउन मन्त्री गिरीलाई सहमत गराएका थिए । श्रम मन्त्रालयका एक उच्च अधिकारीले हिमालय टाइम्ससँग भने, ‘मेनपावर कम्पनीले भनेजस्तो नभएपछि र श्रम स्वीकृतिमा कडाइ गरी कानुनसम्मत काम गरेकाले त्यसकै बदला लिन उनीहरूले पैसाको बलमा डिजीलाई सरुवा गरी छाडे ।’ मेनपावर व्यवसायीले विभागकै केही कर्मचारीको मिलेमतोमा करिब ४ महिना लगाएर एकमुष्ट ५० लाख रुपियाँ जम्मा गरेर मन्त्री गिरीलाई बुझाएको एक व्यवसायीले बताए । ‘हामीसँग पनि रकम मागिएको थियो, तर दिएनौँ,’ ती व्यवसायीले आफ्नो नाम नछाप्ने सर्तमा भने, ‘तर व्यवसायीहरूले उठाएर संयुक्त रूपमा पैसा दिइसकेछन् ।’ ती व्यवसायीले आवश्यक परेमा सबै विवरण खोल्ने हिमालय टाइम्सलाई बताए । स्रोतका अनुसार गणतान्त्रिक वैदेशिक रोजगार व्यवसायी संघ, नेपाल वैदेशिक रोजगार व्यवसायी संघ, नेपाल लोकतान्त्रिक वैदेशिक रोजगार व्यवसायी फोरमलगायतका पदाधिकारीले रकम उठाएर मन्त्री गिरीलाई दिएका थिए । वैदेशिक रोजगार व्यवसायी तुलसी काप्रीले मोटो रकम दिएर महानिर्देशक सरुवा भएको चर्चा गलत हुन नसक्ने बताए । व्यवसायी र विभागकै कर्मचारीको मिलेमतोमा महानिर्देशक सरुवा गरी आफू अनुकूलको श्रम स्वीकृति लिन खोजेको बताउँदै उनले भने, ‘ठूला व्यवसायीको एकलौटी निर्णय र चलखेलले वैदेशिक रोजगार क्षेत्र नै बदनाम भएको छ ।’ मन्त्री सरिता गिरीले भने यस विषयमा कुनै पनि टिप्पणी गर्न चाहिनन् । ‘एक्लो बृहस्पति झुटो हुन्छ, अहिले म यसबारे केही टिप्पणी गर्न चाहन्नँ,’ ५० लाख रुपियाँ बुझेको भन्ने विषयमा हिमालय टाइम्सले फोन सम्पर्क गरेर सोध्दा मन्त्री गिरीले भनिन्, ‘हाम्रो सबै प्रणाली नै भ्रष्ट भएको छ, मैले ४ महिना लगाएर संशोधन गरेको बुँदा कार्यान्वयन नगरेपछि तीन महिनाका लागि काज सरुवा गरेकी हुँ । ’ गणतान्त्रिक वैदेशिक रोजगार संघका अध्यक्ष बलबहादुर तामाङले पैसा उठाएर महानिर्देशक हटाएको चर्चा ‘कतार र कुबेत दूतावासमार्फत चलाइएको हल्ला’ भएको टिप्पणी गरे । ‘महानिर्देशकको सरुवा हामीलाई चासो हुने कुरो होइन, व्यवसायीले पैसा दिएर सरुवा गरेको भन्ने आरोप हाम्रो शाख गिराउने षड्यन्त्र मात्र हो,’ तामाङले भने । नेपाल वैदेशिक रोजगार व्यवसायी संघका उपाध्यक्ष ज्ञानु गैरेले यस विषयमा कुनै पनि टिप्पणी गर्न चाहेनन् । ‘अहिले यस विषयमा म बोल्दिनँ,’ गैरेले हिमालय टाइम्ससँग उनले भने ।