भन्सार जाँचपासमा सधैंजसो अनियमितता
 संलग्नताको आशंकामा कर्मचारीसँग बयान

भन्सारबाट भित्रिएका सामानमा अनियमितता फेला पर्न थालेपछि राजस्व अनुसन्धान र भन्सार विभागले जाँचपासमा संलग्न कर्मचारीलाई धमाधम हाजिर गराउन थालेका छन् । व्यवसायीलाई मात्र कारबाही गर्दा अनियमितता दोहोरिएकाले जवाफदेही बनाउन छानबिन थालिएको हो ।
राजस्व अनुसन्धान विभागले वीरगन्ज भन्सारका नायब सुब्बाद्वय रामेश्वर चौधरी र धीरजकुमार थापासँग बयान लिएको छ । उनीहरूलाई खोजेको बेला उपस्थित हुने गरी मंगलबार कार्यस्थल जान अनुमति दिएको छ । विभागले गत ५ गते उक्त भन्सारबाट जाँचपास भएको सामान मलेखु नजिक बरामद गर्दा प्रज्ञापनपत्रमा पूरा विवरण नभरे पनि सामान जाँचपास भएको फेला परेको थियो । यस्तै भन्सारमा घोषणा गरेभन्दा केही बढी सामान (गलत घोषणा) फेला परेको थियो । 'गलत घोषणाभन्दा प्रज्ञापनपत्रमा कतिपय विवरण खाली छाडेको अवस्थामा सामान जाँचपास गर्नु गम्भीर गल्ती थियो,' राजस्व अनुसन्धान सम्बद्ध स्रोतले भन्यो ।
विभागले यसअघि वीरगन्जकै भन्सार अधिकृत फणिन्द्र अर्याल र खरिदार रामकैलाश रायलाई यहाँ उपस्थित गराएको थियो । गत फागुनमा वीरगन्जबाट मन्त्रालयमा सरुवा भएका रायलाई संयुक्त लोकतान्त्रिक मोर्चा सम्बद्ध नेताको समूहले सरकार गिराउने धम्की दिएपछि थमौती गर्नुपरेको अर्थ सम्बद्ध स्रोतले बताएको छ ।
भन्सारले १ सय ५० कार्टुन अगरबत्ती भनेर जाँचपास गरेको सामान विभागको टोलीले बरामद गर्दा २८ वटा कार्टुनमा महँगा साडी, सर्टिङसुटिङको कपडा फेला परेको थियो । विभागले गत पुस २५ गते चितवनको टिकौली जंगलमा लुकाइराखेको ना३ख १६९८ नम्बरको ट्रकबाट उक्त सामान बरामद गरेको थियो । रोज वल्र्ड इन्टरनेसनल र्फमको नाममा रहेको प्रज्ञापनपत्रमा उल्लेख भएको भन्दा फरक सामान फेला परेपछि विभागले ६ लाख ९८ हजार रुपैयाँ जरिवाना गरेको थियो ।
भन्सारबाट जाँचपासका क्रममा देखिएको त्रुटि नदोहोरियोस् भनेर कर्मचारीलाई बोलाएर त्रुटिको कारण जान्न चाहेको अनुसन्धान विभागका महानिर्देशक जन्मजय रेग्मीले बताए । 'यसरी सोधपुछ गर्दा कर्मचारी बढी जवाफदेही हुने अपेक्षा छ,' उनले भने ।
राजस्व अनुसन्धानले आफ्ना कर्मचारी हाजिर गराएर बयान लिन थालेपछि भन्सारले पनि बरामद गर्दा अनियमितता पुष्टि भएका जाँचपासमा संलग्न कर्मचारीलाई विभागमा उपस्थित गराई छानबिन थालेको छ । विभागले वीरगन्ज भन्सारका अधिकृत लक्ष्मण श्रेष्ठका साथै नायब सुब्बाद्वय कमल मैनाली र गीताकुमारी न्यौपानेलाई उपस्थित गराएको छ । भन्सार विभागका महानिर्देशक मुक्तिनारायण पौडेलले यसबारे वीरगन्ज भन्सार प्रमुखलाई सोध्नुपर्ने बताए । वीरगन्ज भ्ान्सार प्रमुख रामहरि अर्यालले राजस्व अनुसन्धान र भन्सार विभागबाट लेखिआए अनुसार खुरुखुरु कर्मचारीलाई पठाइदिएको बताए ।
श्रेष्ठले जाँचपास गरेको सामान गत चैत २६ गते प्रहरीले बरामद गर्दा प्रज्ञापनपत्रमा उल्लेख भएभन्दा बढी परिमाणमा फेला परेको थियो । वडा प्रहरी कार्यालय बिर्ताको टोलीले  ना३ख १८८४ नम्बरको ट्रक नियन्त्रण लिई चेकजाँच गर्दा प्रज्ञापनपत्रमा उल्लेख भएभन्दा बढीको सामान फेला परेको थियो । भन्सारको प्रज्ञापनपत्रमा व्यवसायीले १७ लाख ९५ हजार ४ सय रुपैयाँ बराबरको १ सय ८ पोका कटन साडी, महिलाको धोती, मरदानी, पूजाको कपडा घोषण गरेका थिए । तर सामान जाँच्दा घोषणा गरेभन्दा १० पोका बढी सामान फेला परेको थियो । महँगा सर्टिङसुटिङ, सलवार कुर्ता, मखमल फेला परेको थियो । विभागको क्षेत्रीय कार्यालयले ११ लाख रुपैयाँ जरिवाना गरी ट्रक सामान छाडेको थियो । तर सोही विभागको थानकोटस्थित चेकपोस्टले छड्के परीक्षण गर्दा क्षेत्रीय कार्यालयले फेला पारेको भन्दा बढी सामान बरामद भएको थियो ।

काठमाडौ, जेष्ठ २४ -