लक्ष्यअनुसार राजस्व असुली गर्न सुझाव

अर्थ मन्त्रालयले लक्ष्यअनुसार राजस्व असुली गर्न माताहतका कर्मचारीहरूलाई सुझाव दिएको छ।  चितवनको भरतपुरस्थित आन्तरिक राजस्व कार्यालयको स्थलगत निरीक्षणका क्रममा अर्थसचिव कृष्णहरि बास्कोटाले राजस्व कार्यालयहरूलाई तोकिएको लक्ष्यअनुसार राजस्व असुली गर्नुका अतिरिक्त आनो कार्यालयको कार्यक्षेत्रभित्र पर्ने स्थानको उन्नति र प्रगतिका लागिसमेत सृजनशील भई वार्षिक बजेट र नीति निर्माणमा सुझाव दिन आग्रह गर्नुभएको हो। अर्थसचिव बास्कोटाले एक शहर एक पहिचानको अवधारणाबमोजिम भरतपुरलाई मेडिकल शहरको रूपमा विकास गर्न सकिने, टिकौलीको खाली जमिनमा अन्तर्राष्ट्रियस्तरको खेल मैदान निर्माण गर्न सकिने, रामपुरमा रहेको कृषि तथा वन विश्वविद्यालयको प्रभावकारिता वृद्धि गर्न सकिने, मलेखुबाट भण्डारा जोड्ने चेपाङ राजमार्गको निर्माणलाई तीव्रता दिन सकिने लगायतका विकल्प सुझाउनुभयो। वैकल्पिक राजधानी र वैकल्पिक अन्तर्राष्ट्रिय विमानस्थलको चर्चा पाउने गरेको चितवनको यस सन्दर्भमा सम्भाव्यताको विश्लेषण गर्न सकिने, चितवनको जंगललाई केन्द्रित गरी पर्यटन प्रवद्र्धन गर्न सकिने, कृषि उब्जनीको निमित्त प्रख्याति आर्जन गरेको चितवनलाई कृषि उत्पादनको केन्द्र तुल्याउन सकिनेजस्ता विषयमा विश्लेषणात्मक सुझाव दिन आफू मातहतका कर्मचारीलाई आग्रह गर्नुभएको छ। अर्थसचिव बास्कोटाले आन्तरिक राजस्व कार्यालय भरतपुरको स्थलगत निरीक्षण गरी कर्मचारीलाई व्यावसायिक आय गर्ने सबैलाई करको दायरामा ल्याउन, बजार अनुगमन गरी खुद्रा तहसम्म मूल्य अभिवृद्धि करको विलविजक जारी गराउन, अन्तःशुल्क प्रशासनलाई सुदृढ तुल्याउन, घर–बहाल कर असुलीका लागि भरपर्दो तथ्यांक तयार गर्न, शिक्षा सेवाशुल्क तदारुकताका साथ असुली गर्न, सदाचार पद्धतिमा रहन र सदैव करदातामैत्री व्यवहार प्रदर्शन गर्न निर्देश गर्नुभएको छ। आन्तरिक राजस्व विभागले गत आर्थिक वर्ष २०६८÷६९ मा कार्यगत लक्ष्यका आधारमा आन्तरिक राजस्व कार्यालयहरूलाई कार्यप्रगतिका आधारमा अंक प्रदान गर्दा आन्तरिक राजस्व कार्यालय भरतपुरले उत्कृष्ट अंक प्राप्त गरी उत्कृष्टतामा तेस्रो स्थान हासिल गरेको जनाएको छ। उहाँले आर्थिक वर्ष २०६७÷६८ को ३ अर्ब ९१ करोड ७५ लाखको असुलीको तुलनामा गतवर्षको असुली ३१ दशमलव ८ प्रतिशत बढी रहेको बताउनुभयो। आन्तरिक राजस्व कार्यालय भरतपुरको गत आर्थिक वर्ष २०६८÷६९ मा अन्तःशुल्कबाट मात्रै ४ अर्ब ४४ करोड ९४ लाख असुली गरेको छ। यो उक्त कार्यालयको कुल असुलीको ८२ दशमलव ३ प्रतिशत हो। जसअनुसार गोर्खा ब्रुअरीबाट २ अर्ब ८३ करोड ७५ लाख, सनगोल्ड ब्रुअरीबाट ४९ करोड १ लाख, सुमी डिस्टीलरीबाट ३१ करोड ९९ लाख, माउन्ट एभरेष्ट बु्रअरीबाट २६ करोड ३५ लाख, रोलिङ रिभर डिष्टिलर्सबाट १४ करोड ३३ लाख, युनाइटेड लिकर्सबाट १२ करोड ७ लाख, यती डिष्टिलरीबाट ४ करोड ३५ लाख, पर्पेmक्ट लेण्डसबाट १ करोड ८७ लाख र ओम डिष्टिलरीबाट १ करोड २२ लाख अन्तःशुल्कबापत गत आर्थिक वर्षमा असुली भएको जानकारी दिनुभएको छ। गत आर्थिक वर्ष २०६८÷६९ को साउनमा ३८ करोड असुली भएकोमा चालू आर्थिक वर्ष २०६९÷७० को साउनमा ४४ करोड ८४ लाख असुली गर्ने, भदौमा गतवर्ष ३४ करोड ८४ लाख असुली भएकोमा चालू आर्थिक वर्षको भदौमा ४३ करोड ३१ लाख असुली हुने जानकारी दिनुभयो। गत आर्थिक वर्षको प्रथम चौमासिक अवधिमा आन्तरिक राजस्व कार्यालय भरतपुरले १ अर्ब ४९ करोड ५७ लाख असुली गरेकोमा चालू आर्थिक वर्षमा १९ दशमलव ८ प्रतिशतले राजस्व असुली वृद्धि गरी कुल १ अर्ब ८० करोड ८ लाख असुली हुने उक्त कार्यालयको अपेक्षा रहेको बताइएको छ।