शुल्क नलिई सामान छाडियो

भन्सारका छ कर्मचारीमाथि कारबाही सुरु

राजस्व नतिरी आयातकर्ताको गोदाममा पुगेको ४८ लाख रुपैयाँ मूल्यको सामान जेठ २४ गते राजस्व अनुसन्धान विभागले बरामद गरेपछि विमानस्थल भन्सारमा अनियमितता हुने गरेको खुलासा भएको थियो ।

विमानस्थल भन्सारका अधिकृतद्वय राजेन्द्र ढुंगाना र गोविन्द अधिकारी लगायत कर्मचारी विभागको अनुगमन इकाईले उपस्थित गराएको छ । उक्त दिन ढुंगाना जाँचपास र अधिकारी मूल्यांकनको काममा खटिएका थिए । बयान गराएपछि तिनलाई निजामती सेवा ऐनअनुसार कारबाही अघि बढाइने विभागले जनाएको छ । राजस्व अनुसन्धान विभागले प्रज्ञापनपत्र दर्ता नगरी सामान छोडेको फेला परेपछि संलग्न कर्मचारीलाई कारबाही गर्न भन्सार विभागलाई भनेको थियो । यसअघि विभागका उपमहानिर्देशक मधुसुदन पोखरेलको संयोजकत्वमा गठित निरीक्षण टोलीले पनि कार्यालयको कमजोरी भएको ठहर्‍याई कारबाही गर्नुपर्ने प्रतिवेदन दिएको थियो ।   

पिएस मार्केटिङ र सर्डिस इन्टरनेसनलको नाममा आयात भएका क्यामेरा, आइपड, चिप्सलगायत सामान राजस्व नतिरी भन्सारबाट बाहिरिएको थियो । विभागले सामान बरामद गरिसकेपछि आयातकर्ताले राजस्व तिरेर सामान छुटाउन प्रयास गरे पनि विभागले जफत गर्नुका साथै संलग्न कर्मचारीलाई विभागीय कारबाही गर्न सिफारिस गरेको थियो । 'जफत 

भएको थाहा पाएपछि प्रज्ञापनपत्र दर्ता गरी आयातकर्तालाई जोगाउन खोजिएको थियो,' राजस्वसम्बद्ध स्रोतले भन्यो, 'भन्सारले दोहरो अनियमितता गरेको छ ।'

सरकारले भन्सार र आन्तरिक राजस्व कार्यालयलाई घूसमुक्त बनाउने भन्दै कार्य सम्पादनको आधारमा तीन वर्षदेखि २ सय प्रतिशतसम्म प्रोत्साहन भत्ता दिइरहे पनि यस्ता अनियमितता जारी छन् । 

उपप्रधानमन्त्री भरतमोहन अधिकारीले अर्थ मन्त्रालय सम्हालेयता सरुवामा कर्मचारी संगठनका साथै विभिन्न शक्ति केन्द्रको हस्तक्षेप सुरु भएपछि भन्सारमा अनियमितता बढेको अर्थसम्बद्ध स्रोतको भनाइ छ । 'अनियमितता पुष्टि हुँदा पनि संलग्न कर्मचारीलाई कारबाही नगरिएका कारण भन्सारका कर्मच्ाारी अनियमितता गर्न प्रोत्साहित छन्,' स्रोतले भन्यो ।

निकासी नै नगरेका व्यवसायीलाई रसुवा र तातोपानी भन्सारबाट निकासी गरेको प्रज्ञापनपत्र बनाइदिएर राज्यकोषबाट कर फिर्ताको सुविधा अन्तर्गत ७ करोड रुपैयाँ झिक्न सघाउने कर्मचारीलाई अझै कारबाही भएको छैन । रसुवा नाकाको अनियमितता खुलासा भएको एक वर्ष बितिसकेको छ । तातोपानीबाट कागज बनाइदिने सात अधिकृतको पहिचान भएको पनि छ महिना भइसकेको छ । सार्वजनिक लेखा समितिले नक्कली निकासीको प्रमाण बनाइदिएर राज्यकोषमा लुट मच्चाउन सघाउने कर्मचारीमाथि कडा कारबाही गर्न निर्देशन दिएको छ । 

समितिको निर्देशनअनुसार कारबाहीको प्रक्रिया सुरु भइसकेको भन्सार विभागका महानिर्देशक टंकमणि शर्मा बताउँछन् । 'प्रमाण जुटाउने काम भइरहेको छ,' उनले भने ।

काठमाडौ, श्रावण १३ -