रक्तचन्दन लैजाने बाटो  खोजिँदै

रक्तचन्दन निकासीको उपयुक्त समय पर्खिरहेका तस्करहरूले माओवादी र केही पत्रकारहरूको मिलेमतोमा केही दिनभित्रै ठूलो परिमाणमा चन्दन खासा निकासी गर्ने तयारी गरिरहेका छन्। माओवादी पोल्टीब्युरो सदस्य अग्नि सापकोटाका कान्छा छोरा रूपक सापकोटा र पूर्व गृहमन्त्री कृष्णबहादुर महाराका छोरा एटम चन्दन निकासी गर्न प्रत्यक्ष रूपमा संलग्न रहेको माओवादीका एक जिल्ला नेताले जानकारी दिए। सहिद कोटामा चिनियाँ भाषा अध्ययन गर्न ल्हासा गएका सापकोटा दुई महिनाको बिदामा नेपाल आएका थिए। यही बिदाको समयलाई सदुपयोग गर्दे उनीसहितको सक्रियतामा चन्दन निकासी गर्न लागिएको हो। माओवादी सभासद राजकुमार श्रेष्ठका बहिनी ज्वाइँ भीमप्रसादपराजुली र दिपले चन्दन तस्करीहरूलाई सहयोग गर्ने गरेको भए पनि उनी भट्टराई निकट रहेको र उनले पैसा भागबन्डा नगरेपछि  दाहाल पक्षीय सापकोटालाई पनि चन्दन निकासीमा सहयोगका लागि पठाइएको स्रोतको दाबी छ। माओवादी शान्ति प्रक्रियामा आएलगत्तै तातोपानी भन्सार आसपास पार्टीको काम हेर्ने जिम्मा उनैले पाएका थिए।
चन्दन तस्करहरूले केही दिनअघि चन्दन लैजाने योजना बनाए पनि अरनिको राजमार्गको डाक्लङ भन्ने स्थानमा ठूलो पहिरो गएको र बाटो अवरुद्ध हुने गरेपछि निकासी गर्न पाएका थिएनन्। सिन्धुपाल्चोकको राजमार्ग हेर्ने जिम्मा पाएको खाँडीचौरका निलम राजभण्डारी एक साता अघि लाइन क्लियर गर्न सहयोग पुर्यामउन अनुरोध गर्न जिल्ला प्रशासन कार्यालय आएका थिए।  नयाँ आएका प्रमुख जिल्ला अधिकारी कमलमणि काफ्ले र डीएसपी बसन्तकुमार लामाले चन्दन निकासी गर्न नदिने भएपछि सहायक प्रमुख जिल्ला अधिकारी गोविन्द सापकोटालाई मनाउन राजभण्डारी प्रशासन आएको स्रोतको दाबी छ। गत सोमबार डीएसपी लामा मुढे गएको मौका छोपी राजभण्डारी पैसा बोकी काभ्रे र सिन्धुलीको सीमा बन्देउमा रहेको चेक पोष्टमा आएका थिए। उनले प्रत्येक प्रहरीलाई १० लाख रूपैयाँ दिन्छु बाटो खाली गरिदिनुहोस् भनेका थिए तर लामाले नमानेपछि उनी त्यसै फर्किएका थिए। चीनको ल्हासामा हुने सुरक्षा सम्बन्धी बैठकमा भाग लिन प्रमुख जिल्ला अधिकारी र डीएसपी बुधबार जाने भएपछि त्यो समयमा ठूलो परिमाणमा चन्दन निकासी गर्ने तयारी भइरहेको स्रोतको दाबी छ। चन्दन तस्करीहरूले पत्रकारहरूलाई पनि समचार नलेख्न एक पत्रकारमार्फत् च्यानल मिलाएको स्रोतको दाबी छ। उनले यसअघि पनि चन्दन तस्करहरूबाट एकपटक चन्दन निकासी हँुदा १ लाख ६० हजार रूपैयाँ बुझेको स्रोतको दाबी छ।