क्यासिनोमा सुरक्षाकर्मीकै सहयोगमा भारतीय भन्दै नेपाली जुवाडे प्रवेश
रोशन कार्की
काठमाडौं, पुस ३ । लामो समयदेखि क्यासिनो (जुवाघर) मा सरकारले नेपालीको प्रवेशमा रोक लगाएपछि सादा पोशाकका सुरक्षाकर्मीको सहयोगमा एभरेष्ट क्यासिनोमा प्रवेश गराउने क्रम बढ्दै गएको छ । सो क्यासिनोमा नेपालीलाई सिधंै प्रवेश गराउँदा विभिन्न आरोप खेप्दै आएको सुरक्षाकर्मीले नेपालीलाई भारतीय नागरिक भन्दै छिराउने गरेको सोही क्यासिनोका एक कर्मचारीले बताए ।
सरकारले नेपालीलाई क्यासिनो प्रवेशमा निषेध गरेपछि जुवा खेल्ने बानीपरेका नेपालीलाई विभिन्न बहानामा सुरक्षाकर्मीकै सहयोगमा भित्र लैजाँदै गरेको तथ्य फेल परेपछि उनीहरूलाई भारतीय नागरिकको परिचयबाट प्रवेश गराउन थालिएको हो । यसरी छिराउने कार्य उच्च प्रहरी अधिकृतहरूकै निर्देशनमा हुने गरेको पनि नाम उल्लेख नगर्ने सर्तमा सोही क्यासिनोका एक कर्मचारीले जानकारी दिए । उनले भने, ‘विशेषगरी भारतको दार्जलिङ, विहारका नागरिक भन्दै क्यासिनोमा नेपाली छिराउने काम प्रहरीले गरेको छ, सो छिराएबापत क्यासिनो सञ्चालकसँग प्रहरीले अवस्था हेरी साताको न्यूनतम् १ लाख २५ हजार रुपैयाँ असुली गर्ने गरेका छन् ।’ उनका अनुसार सो रकम सादापोशाकका (घुमुवा) प्रहरीले बुझ्ने गरेको र सो रकम माथिल्लो तहसम्म पु¥याउने गरिएको छ ।
बर्दीधारी प्रहरीले रोकेजस्तो गर्ने र केही समयपछि सादापोशाकमा रहेका सुरक्षाकर्मीले नेपालीलाई क्यासिनोको पछाडि टिनको ढोकाबाट भित्र पठाउने गरेको ती कर्मचारीले बताए । ती कर्मचारीले भने, ‘एभरेष्ट क्यासिनोको पछाडि दुईवटा टिनको खापाबाट तयार पारेको ढोकाबाट भित्र छिराउने गरिएको छ भने छिराएपछि सो ढोकामा भित्रबाट ताल्चा लगाउने प्रबन्धसमेत प्रहरीले नै मिलाएको छ ।’
गोप्यरूपमा आफ्नो कारोबार जारी राख्न सरुवा भएर आएका सुरक्षाकर्मी र उच्चतहका सुरक्षाकर्मीको ठाडो निर्देशनमा सो कार्य हुने गरेको ती कर्मचारीको दाबी छ । सो अवैध कारोबारमा विगत लामो समयदेखि महानगरीय प्रहरी बृत्त बानेश्वरको मुद्दा फाँटमा कार्यरत सहायक प्रहरी निरीक्षक प्रेम रेग्मी, घुमुवा प्रहरी चन्द्रबहादुर भाट, हालै बानेश्वर बृत्त सरुवा भएका वासुदेव नेपालले क्यासिनोमा नेपाली प्रवेश गराउन पर्दापछाडिबाट सहयोग गर्दै आएको स्रोतको भनाइ छ ।
घुमुवा (सादापोशाकका प्रहरी) लाई समाजमा अराजक, अपराध र अवैध कारोबारविरुद्ध सूचना संकलन गर्नका लागि गृहमन्त्रालयले छुटै समूह गठन गर्न लागिरहेका बेला प्रहरीको उच्च अधिकारीहरूले घुमुवा परिचालन गरेर पैसा असुल्दै आएको खुलेको हो । सूचना संकलनका नाममा धेरै प्रहरी अधिकृतहरूले सादापोशाकका अर्थात् घुमुवा प्रहरीलाई पैसा असुल्न लगाउने गरेका छन् ।
महानगरीय प्रहरी परिसर काठमाडौं मातहत मात्र ४२ जना घुमुवा प्रहरी रहेका छन् । परिसरका उच्च तहबाटै आफू अनुकूलका घुमुवाहरू राखी अवैध कारोबार गर्दै आएको एक सुरक्षाकर्मीले नाम उल्लेख नगर्ने सर्तमा बताए । ती प्रहरीले भने, ‘अहिले घुमुवा जुन उद्देश्यले परिचालन गरिएको हो त्यो नभए क्यासिनो, व्यवसायी र अवैध कारोबार गर्नेसँग रकम संकलन गर्नेजस्ता कार्यमा बढी केन्द्रित भएका छन् ।’
बानेश्वर प्रहरी बृत्तका प्रहरी नायव उपरीक्षक भीम ढकाल भने सो कार्यमा सुरक्षाकर्मीको कुनै हात नहुने भन्दै नेपालीलाई क्यासिनो प्रवेश गराएको भन्ने आरोपमात्र भएको जिकिर गर्दै आएका छन् । उनले भने, ‘हामी क्यासिनोभित्र पस्न पाउँदैनांै, बाहिरबाट मात्र सुरक्षा प्रदान गर्ने हो, अरू हामीबाट केही गर्न नमिल्दैन ।’ काठमाडौंका क्यासिनोमा छापा मारेको देखाउने अनि छापा पछाडि पुनः नेपाली जुहाडेलाई क्यासिनो छिराउने कार्यसमेत चोर बाटो प्रयोग हुँदै आएकोे छ । यसरी प्रहरीको सम्पर्कबाहेक कोही आफूखुशी क्यासिनो छिरी जुवा खेल्नेहरू भने प्रहरीको नियन्त्रणमा पर्ने गरेका छन् ।
सो क्यासिनोमा शंकमूल, बानेश्वर, थापागाँउ, ललितपुर र खासा व्यापारीहरू बढी मात्रामा जाने गरेका छन् भने सो क्यासिनोमा नेपाल प्रहरीको ‘मोष्ट वान्टेड’ मा रहेका खासा व्यापारी, क्याम्पस सञ्चालक, मेनपावर सञ्चालक र वैदेशिक रोजगार विभागका केही कर्मचारीले समेत क्यासिनोमा प्रहरीको सुरक्षाभित्र रही अवैध कारोबारको योजना र रकमको बाँडफाँडसमेत गर्ने गरेका सोही क्यासिनोका कर्मचारीको दाबी छ ।
काठमाडौंमा मल्ल होटलको क्यासिनो भेनस, ¥याडिसन होटलको क्यासिनो ¥याड, होटल याक एन्ड यतीको रोयल, हृयातको क्यासिनो तारा, होटल एभरेष्टको एभरेष्ट क्यासिनो र सांग्रीलाको क्यासिनो सांग्रीला सञ्चालनमा छन् । काठमाडौं बाहिर पोखरामा फूलबारी क्यासिनो सञ्चालनमा छ । क्यासिनोमा नेपालीको प्रवेश गैरकानुनी मानिए पनि प्रत्येक क्यासिनोमा ९० प्रतिशत ग्राहक नेपाली नै हुने गरेका छन् । स्रोतका अनुसार क्यासिनो सञ्चालकले प्रहरीलाई पा“च तहसम्म घूस खुवाउने गरेको खुलासा भएको छ । घूस खुवाउनकै लागि क्यासिनो सञ्चालकले मासिक लाखौं रुपैया“ बजेट छुट्याउने गरेको थाहा हुन आएको छ ।