तामाङलाई हटाएर वाग्ले अध्यक्ष
रोशन कार्की
काठमाडौं । नेपाल वैदेशिक रोजगार व्यवसायी संघको विवाद चुलिएपछि राजधानीको तेजभवनस्थित संघको कार्यालयलाई प्रहरीले नियन्त्रणमा लिएको छ । संघका अध्यक्ष र अन्य सदस्यबीच लामो समयदेखि बढ्दै गएको विवादका कारण दुवै पक्षका अध्यक्ष हंसराज वाग्ले र बलबहादुर तामाङ लाजिम्पाटस्थित तेजभवनमा पुगेपछि झडप नै हुने अवस्था आएकोले प्रहरीले कार्यालय आफ्नो नियन्त्रणमा लिएको हो । अध्यक्ष तामाङ पक्षले मंगलबार पत्रकार सम्मेलन गर्ने भन्दै सूचना जारी गरेका थिए तर वाग्ले पक्षधरले सो सूचना संघको आधिकारिक नभएको भन्दै विरोधमा उत्रिएपछि झडपको स्थितिसम्म पुगेको थियो । उक्त सूचना संघको आधिकारिक नभएको र पत्रकार सम्मेलनको कुनै औपचारिक कार्यक्रम नभएको महासचिव कमल तामाङद्वारा जारी विज्ञप्तिमा भनिएको छ ।
कार्यालयमा दुई दर्जनभन्दा बढी प्रहरीले सुरक्षा दिइरहेका छन् । वैदेशिक रोजगार व्यवसायी संघको असन्तुष्ट पक्षले सोमबार निर्वाचन गरी नयाँ कार्यसमिति घोषणा गरेको थियो । निर्वाचनमा कांग्रेसनिकट रोजगार व्यवसायी वाग्ले अध्यक्षमा निर्विरोध निर्वाचित भएका थिए । यसअघि एमालेनिकट अध्यक्ष बलबहादुर तामाङले व्यवसायीविरुद्ध बोलेको आरोप लगाउँदै असन्तुष्ट पक्षले ४ महिनाअघि अविश्वासको प्रस्ताव ल्याउँदै गत ११ गते तामाङलाई हटाएको दाबी गरेका थिए । अध्यक्षबाट तामाङलाई हटाएर पूर्वअध्यक्ष सोमलाल बाटाजुको संयोजकत्वमा नयाँ समिति चयन भएको असन्तुष्टको दाबी रहेको छ ।

वैदेशिक रोजगार व्यवसायी संघ विवाद

               कार्यालय प्रहरी नियन्त्रणमा
बाटाजुकै संयोजकत्वमा सोमबार निर्वाचन भएको हो । अहिले निर्वाचित वाग्ले डेढ वर्षअघि तामाङसँग निर्वाचनमा पराजित भएका थिए । संघको प्रथम उपाध्यक्षमा ज्ञानप्रसाद गैरे, द्वितीय उपाध्यक्षमा कुमुद खनाल, तृतीय उपाध्यक्षमा भुवनसिंह गुरुङ, महासचिवमा कमल तामाङ, सचिवमा विनोदजंग केसी, कोषाध्यक्षमा शारदा न्यौपाने र सदस्यहरूमा चिरमणि पौडेल, यमुण्डा गिरी, माधुरी पौडेल, दुर्गाबहादुर लिम्बू, टेकराज ज्ञवाली, दीपक सिञ्जाली, यादव लामिछाने, रामराजा अधिकारी, राजेशशंकर विक र मोहनकुमार ढुंगेल निर्विरोध निर्वाचित भएको नयाँ कार्यसमितिको दाबी छ ।
७ सय ५८ जना सदस्य रहेको संघमा सोमबार ३ सय जनाको उपस्थितिमा निर्वाचन गरिएको थियो । पटक पटक व्यवसायीका हकहितमा बोल्न र सहयोग गर्न आग्रह गर्दा उल्टै व्यवसायीविरुद्ध बोल्दै हिँड्न थालेपछि तामाङलाई हटाएर निर्वाचन गरिएको वाग्लेले बताए । उनले भने, ‘अब नयाँ कार्यसमितिले व्यवसायीका समस्याको गहन अध्ययन गरेर अघि बढ्छ ।’ व्यवसायीले सरकारसामु राखेका १८ बुँदे माग कार्यान्वयनमा ल्याउन पहल गर्ने वाग्लेको भनाइ छ ।
संघका अध्यक्ष तामाङले निर्वाचनलाई जनयुद्धमा विद्रोहीले घोषणा गरेको जनसरकारजस्तै भएको बताएका छन् । अध्यक्ष तमाङले भने, ‘त्यतिखेर सरकार वैधानिक रूपमा चल्दा विद्रोहीले जनसरकार बनाएका थिए । यो निर्वाचन र कार्यसमिति पनि त्यस्तै हो ।’ उनले यो कामले झन् द्वन्द्व निम्त्याएको बताउँदै अब संघ कि फुट्ने कि द्वन्द्वमा जाने बताए । असन्तुष्ट पक्षले संघको कार्यालय तेजभवनमा निर्वाचन गरेको थियो तर तामाङले आपूm मंगलबारबाटै संघमा जाने बताए । ‘कसैले एक दिन अध्यक्ष हुन्छु भन्छ भने होस् तर वैधानिक कार्यसमिति भंग गर्ने वैधानिक बाटो चाहिन्छ,’ उनले भने । असन्तुष्ट पक्षले अविश्वास प्रस्ताव बहुमत सदस्यले दर्ता गरेको र अध्यक्षले विशेष साधारणसभा पनि नबोलाएकाले जिल्ला प्रशासनको पत्रमार्फत आपूmहरूले नयाँ समितिमार्फत निर्वाचन गरेको जनाएको छ । बाटाजुले भने, ‘पहिले २ सय ९३ जनाले विशेष साधारणसभा माग गर्दा भएन, त्यसपछि व्यवसायीकै विरोधमा बोल्न थालेपछि बहुमत सदस्यले अविश्वासको प्रस्ताव दर्ता गरी हटाइएको हो ।’ अविश्वासको प्रस्ताव दर्ता गर्नेमा वैदेशिक रोजगार व्यवसायी फोरमका अध्यक्ष विमल ढकालसहित पूर्वअध्यक्ष बाटाजु, तिलक रानाभाट र प्रेम कटवाललगायत थिए । चार महिनाअघि अध्यक्ष तामाङले व्यवसायीविरुद्ध काम गरेको भन्दै प्रथम उपाध्यक्षसहित ११ जना कार्यसमिति सदस्यले राजीनामा दिएका थिए । अविश्वासको प्रस्तावलगायतमा नक्कली हस्ताक्षर भएको भन्दै संघले छानबिन गरिरहेको छ । असन्तुष्टले गत कात्तिकमा समेत अध्यक्षको राजीनामा र विशेष साधारणसभा मागेका थिए ।