क्यासिनोमा पकड राख्न प्रयासरत नेपाल रिक्रिएसन सेन्टरका कार्यकारी राकेश बाधवाले शुक्रबार सर्वोच्चमा सेन्टरलाई खारेज गर्ने पर्यटनको निर्णयविरुद्ध पुनः निवेदन दर्ता गराएका छन् । यसअघि सेन्टरको आधिकारिक प्रतिनिधि तोकिएका नरेन्द्र श्रेष्ठले मुद्दा फिर्ता लिइदिएका थिए ।
लगानी नगरे पनि आरडी टटलसँग कानुनी लडाइँ गरी क्यासिनोको स्वामित्व हत्याउन सफल बाधवा अहिले स्वामित्व जोगाउन अन्तिम प्रयास गरिरहेका छन् । दिल्लीबाट आएका दुईजना वकिल रातदिन स्थानीय वरिष्ठ वकिलको समूहसँग बैठक गरी योजना बनाइरहेका छन् । 'दुई तरिकाबाट स्वामित्व जोगाउने प्रयास भइरहेको छ,' उनका एक वकिलले भने, 'रिक्रिएसन सेन्टरको अस्तित्व कायम राख्न अदालत गइएको छ र आफू नियन्त्रित कम्पनी मातहत क्यासिनोलाई ल्याउने काम पनि भइरहेको छ ।'
पर्यटन मन्त्रालयले रिक्रिएसन सेन्टरलाई क्यासिनो सञ्चालन गर्न दिएको इजाजत खारेज गर्ने निर्णय आइतबारै गरिसकेको छ । तर उक्त निर्णयको जानकारी मन्त्रालयले सेन्टरलाई गराएको छैन । पर्यटनले बिहीबार पत्र बुझाउने जनाए पनि शुक्रबारसम्म यस्तो पत्र पठाएको छैन । पर्यटन प्रवक्ता लक्ष्मण भट्टराई प्राविधिक कारणले पत्र बुझाउन नपाएको बताउँछन् । पर्यटनका एकथरी कर्मचारी रिक्रिएसन सेन्टरलाई अन्तरिम आदेश पाउन सजिलोका लागि पत्र नदिएको बताउँछन् ।
मुलुकमा आठ क्यासिनो चलाएको रिक्रिएसन सेन्टरसँग केहीअघिसम्म चारवटा क्यासिनो थिए । तर सेन्टरनै खारेज हुने अवस्थामा पुगेपछि क्यासिनोको व्यवस्थापन परिवर्तन गरी क्यासिनो जोगाउने काम भइरहेको छ । पर्यटनले निर्णय गरेपछि ह्यातस्थित क्यासिनो ताराको व्यवस्थापन सिंगापुरको एसियन रिसोर्ट एन्ड क्यासिनो -एआरसी) ले लिएको छ । एआरसीले एसियन रिसोर्ट एन्ड टुरिज्म नामको कम्पनी अन्तर्गत यसै साता ताराको व्यवस्थापन लिएको हो । कम्पनीमा बाधवा नदेखिए
पनि उनी निकटकी नइला असरफ -विष्ट) कम्पनीको प्रबन्ध निर्देशक बनाइएकी छन् । नेपाली सैनिक अधिकृत यादव विष्टसँग विवाह गरेकी भारतीय नागरिक असरफलाई बाधवाले क्यासिनो सांगि्रलाको म्यानेजर बनाएका थिए ।
'केहीअघि बाधवाले सिंगापुर पुगेर सम्झौता गरेपछि व्यवस्थापन परिवर्तन भएको हो,' उनी निकट स्रोतले भन्यो, 'नदेखिए पनि क्यासिनोमा उनको नियन्त्रण हुनेछ ।' क्यासिनो एभरेस्टमा पनि उनले आफ्नै पूर्वकर्मचारी बावासरकार श्रेष्ठलाई अघि सारेर व्यवस्थापन हस्तान्तरण गर्ने योजना बनाएको सम्बद्ध स्रोतको दाबी छ । 'सर्वोच्चले पर्यटनको निर्णय खारेज गरे रिक्रिएसन सेन्टर अन्तर्गत चल्नेछ,' निकट स्रोतले भन्यो, 'बदर नभए उनका मान्छेको कम्पनीले लिनेछ ।' एभरेस्ट र तारा क्यासिनो बक्यौता नरहेकाले उनले कुनै हालतमा गुमाउने छैनन् ।
बाधवाले क्यासिनो नेपाल (सोल्टी) र अन्ना (अन्नपूर्ण) को स्वामित्व पनि छाड्न चाहेका छैनन् । अन्नाको क्यासिनो इजाजतवाला कम्पनी अन्नपूर्ण इन्टरनेसनलको स्वामित्व तप्तबहादुर विष्टका साथै भारतीय नागरिक अशोक वासन र अरुणसिंह ठाकुरले खरिद गर्ने आपसी सम्झौता गरे पनि स्वामित्व हस्तान्तरणको कानुनी प्रक्रिया पूरा भएको छैन ।
क्यासिनो नेपाल र अन्नामा राजस्व र अरू दायित्व नतिर्ने तर स्वामित्व पनि नछाड्ने बाधवाको योजनाको कारण ती क्यासिनोको सञ्चालन अन्योलमा छन् । राजस्व अनुसन्धान विभागका अनुसार अन्नाको नयाँ व्यवस्थापनले राजस्व बक्यौतामध्ये २५ लाख रुपैयाँ तिरेर थप रकम चाँडै तिर्ने प्रतिबद्धता जनाएको छ । तर बाधवाको उक्त क्यासिनोमा आफ्नो दाबी छाडेका छैनन् ।
कर्मचारीलाई सात महिनादेखि तलब नदिएका बाधवाले क्यासिनो नेपाल पनि छाड्न चाहेका छैनन् । व्यवस्थापन लिन तयार मलेसियाको 'स्टार म्यानेजमेन्ट' पनि कानुनी लडाइँमा फसिने भएकाले पछि हटेको होटल सोल्टी सम्बद्ध स्रोतले बताएको छ । क्यासिनो नेपालको १६ करोड रुपैयाँ राजस्व बक्यौताका साथै कर्मचारी र होटलको गरी रिक्रिएसन सेन्टरमाथि ५० करोड रुपैयाँ बक्यौता छ ।
'आफू पनि नहट्ने अरूलाई पनि चलाउन नदिने खेलको सिकार सात सय मजदुर भएका छन्,' क्यासिनो नेपालका मजदुर नेता अमिर खड्काको गुनासो छ, 'कि राजस्व र कर्मचारीको तलब दिनुपर्यो होइन भने अरूलाई बाटो छाड्नुपर्यो ।'
मायोज चाउचाउ उत्पादन गरिराखेको यहाँको उग्रतारा जनागाल-१ स्थित हिमालनय स्न्याक्स् एण्ड नुडल्स् प्रालिको गोदाम घरमा सोमवार बिहान लागेको भीषण आगलागी नियन्त्रणमा आएको छ ।स्थानीय बासिन्दा, नेपाली सेना, शसस्त्र प्रहरी, नेपाल प्रहरीद्वारा आगो नियन्त्रण गर्ने प्रयास गरे पनि आगो फैलिदै गएपछि आगो लाग्न सुरु भएको एक घण्टा पछि भक्तपुरबाट आएको दमकलले नियन्त्रणको प्रयास गरेको थियो । दमकलले आगो नियन्त्रणमा लिन नसकेपछि थप सहयोगको लागि स्थानीय प्रशासनको पहलमा त्रिभुवन अन्तराष्ट्रिय बिमानस्थलको समेत गरी ४ वटा दमकल र खानेपानी संस्थानका केही सवारी साधनहरु सहितको पहलमा बिहान १०ः४० देखि आगो लागेको ५ घण्टापछि आगो नियन्त्रण आएको हो । आगलागीले गर्दा गोदाम भवन पूर्ण रुपमा ध्वस्त हुँनुको साथै त्यस भित्र रहेका सबै सामानहरु जलेर नष्ट भएका छन् । आगलागी सुरु हुने बित्तिकै मजदुरहरु बाहिर निस्केकाले कुनै मानविय क्षति भएन । उक्त कारखानाबाट मायोज, साकालाका बुम, हुर्रे, लेकाली लगायतका ७ नामका चाउचाउ, २ नामका चिजबल, र हाम्पर्ट्टी उत्पादन हुँदै आइरहेको छ । 'गोदाममा चाउचाउ उत्पादनका लागि चाहिने कच्चा पदार्थ, मेसिनरी पार्टपुर्जा रहेको थियो' कारखानाका प्रशासकीय अधिकृत गौतमप्रसाद गौतमले भने 'त्यही भवनमा प्रशासकिय विभाग समेत संचालन गदै आएका थियौ ।' आगो फैलिदै गएपछि वरपरका व्यापारीहरुले पसलबाट सामानहरु सुरक्षित स्थलतर्फ लगेका थिए । आगो नियन्त्रणका लागि नेपाल प्रहरीका १ सय जना, गुहेश्वरी गण दुवाकोटबाट ४० जना शसस्त्र प्रहरी, खड्गध्वज गण धुलिखेलका ७० जना नेपाली सेना आगो नियन्त्रणको लागि खटिएका थिए ।'आगलागी बारेमा हामीले अनुसन्धान थालेका छौं' जिल्ला प्रहरी कार्यालयका प्रमुख प्रहरी नायव उपरिक्षक सुरेन्द्र प्रसाद मैनालीले भने 'आगलागीको कारण खोज्दै छौं ।'आगलागीबाट भएको क्षतिको मूल्याङ्कन भइनसकेको कारखानाका अप्रेशन विभाग प्रमुख रविन्द्र सिलवालले जानकारी दिए । 
