धन्न! सत्य बोल्दा रै’छन् चौधरी पुत्र
गएको मंसिर तीन गतेको कुरा हो। दरबारमार्गस्थित होटल अन्नपूर्णको कुमारी हलमा चौधरी समुहको सिजी अटोमोबाइल अन्तर्गतको अरुण इन्टरकन्टिनेन्टलको पत्रकार सम्मेलन भइरहेको थियो। मारुती सुजुकीका गाडी बेच्ने यो कम्पनीले त्यसदिन इको नामको भ्यानको विषयमा जानकारी दिँदै थियो। प्रश्नोत्तरका क्रममा कम्पनी सम्हाल्ने अरुण चौधरीका छोरा करणले प्वाक्क भनिहाले, यो भ्यान एकदमै राम्रो छ, इन्जिनका केही डिफेक्ट बाहेक।भर्खरै जुंगाको रेखी बसेका करणको यो भनाइ भूँइमा खस्न नपाउँदै एउटा मासिक पत्रिकाका सम्पादकले प्रश्न तेर्स्याए, इन्जिनमै डिफेक्ट भएको गाडी किन ल्याउनु भएको त बजारमा? त्यसपछि करणले इन्जिनको समस्याले खासै असर नगर्ने बताए। तिनको उत्तरले असन्तुष्ट ती सम्पादकले प्रश्न गरे- इन्जिनमै खराबी भए कसरी गाडी चलाउनु? त्यसपछि करणको उत्तर थियो, तपाइँसँग अब कुरा नमिल्ने भयो। बसेरै कुरा गर्नुपर्ला अफिसमा आउनुस् न।उनको यो प्रस्तुतिले कार्यक्रम हलको पछाडि बसिरहेका बाबु अरुणको मुख रातो भयो। उता करणको छेवैमा बसेका कम्पनीका अटो इन्जिनियरले भने उनको हातबाट माइक खोसेर आफै उत्तर दिन थाले। त्यसबेलासम्म हलमा हाँसो फैलिइसकेको थियो। तर यो हाँसोको विषय मात्र पक्कै थिएन। जनताको सुरक्षासँग गाँसिएको कुरा थियो, उपभोक्ताको अधिकारसँग गाँसिएको कुरा थियो। करणको भनाइले नै इन्जिनमा खराबी देखिएर भारतमा समेत असफल भइसकेको गाडी बेचेर उपभोक्ता ठगिँदै थियो। र, ठगीको बारेमा उपभोक्ताले जानकारी नपाउन् भनेर सार्वजनिक कार्यक्रममै एक सम्पादकलाई प्रलोभन देखाइँदै थियो। यो चौधरी समूहले लुकाउन खोज्दाखोज्दै बाहिर आएको तथ्य थियो। यसको साक्षी त्यो कार्यक्रममा उपस्थित एक दर्जनभन्दा बढी पत्रकार छन्।
चौधरीको गाडी बेच्ने त्यही अरुण इन्टरकन्टिनेन्टलले अहिले नक्कली कारोबार देखाएर भ्याट छलेको तथ्य सार्वजनिक भएको छ। यो सार्वजनिकिकरणसँगै चौधरी समूह र यसका नाइकेहरु राजस्वमाराको रुपमा दरिन पुगेका छन्। हुनत खेताला खोजेर लेखाइएको लेखमार्फत् कूतर्क गर्दै चौधरी समूहका अध्यक्ष विनोदले आफूलाई खुबै जनपक्षीय भएको देखाउने दुस्साहस गरेका छन्। गाडी बेच्ने कम्पनी बाहेक सिजी इम्पेक्स र सिजी फुड्सको नाममा समेत भ्याट छलेका उनकै दुई कम्पनी युनाइटेड फाइनान्स र नर्भिक अस्पतालले पनि केही वर्ष अघि कर छलेको भेटिएकै हो। यी घटनाले उनी कान्तिपुरमा छपाएको लेखमा उल्लेख गरेजस्तो पानी माथिको ओभानो छैनन् भन्ने प्रष्ट भइसकेकै छ।
जनताले तिरेको कर छलेर जम्मा गरेको कालो धनलाई विदेश पुर्याउन खप्पिस चौधरीले आफ्ना उत्पादनमार्फत् तपाईँ हाम्रो स्वास्थमा पनि खेलवाड गरिरहेका छन्। जसको पछिल्लो उदाहरण हो Binod Chaudharyका कान्छा भाइ अरुणको नाममा दर्ता भएको र उनका छोरा निर्वाणको नाममा स्थापित निर्वाण वनस्पती उद्योगले उत्पादन गरेको तेलको गुणस्तर। निर्वाण वनस्पतिले उत्पादन गरेर बजारमा ल्याएको सर्वोत्तम ब्रान्डको तोरी तेल गुणस्तरहीन मात्र होइन मानव स्वास्थ्यका लागि हानिकारक समेत रहेको निश्कर्ष प्रयोगशाला परीक्षणले निकालेको छ। त्यो पनि कुनै निजी प्रयोगशाला परीक्षणले होइन, सरकारी निकाय खाद्य तथा गुणस्तर नियन्त्रण विभागको प्रयोगशालाले।
विभागको प्रयोगशाला परीक्षणले भन्छ, सर्वोत्तम तोरीको तेलमा पेरोक्साइड भ्यालु १७ मिलिलिटर इक्वीभ्यालेन्ट रहेको छ। वैज्ञानिक परीक्षणका आधारमा तोरी तेलका लागि तोकिएको पेरोक्साइड भ्यालुको मात्रा हो १० मिलिलिटर इक्वीभ्यालेन्ट। अब भन्नुस् ७ मिलिलिटर इक्वीभ्यालेन्ट बढी पेरोक्साइड भ्यालु भएको तोरीको तेल नियमित सेवन गरे के होला? चिकित्सकहरु भन्छन् यसले पाचन प्रणालीमा असर गर्छ। नियमित सेवनले अल्सर लाग्छ।
दुई वटा मुद्दा
पेरोक्साइड भ्यालु बढी देखिएपछि खाद्यको परीक्षण प्रतिवेदन अनुसार अरुण चौधरीविरुद्ध दुईवटा छुट्टाछुट्टै मुद्दा दर्ता भएका छन्। वाणिज्य विभागले गुणस्तरहीन खाने तेल उत्पादन र बिक्री गरी उपभोक्ता ठगी गरेको आरोपमा गत असोज १५ गते जिल्ला अदालत काठमाडौँमा दायर गरेको मुद्दा अहिले पनि विचाराधीन छ। उसले उत्पादन मिति २००९ अप्रिल भएको ब्याच नम्बर ५ को सर्वोत्तम तेलको परीक्षणमा पेरोक्साइड भ्यालु बढी देखिएको भन्दै मुद्दा हालेको हो।
उपभोक्ता संरक्षण ऐन अनुसार अदालतमा मुद्दा दायर गरिएको छ। अदालतले चौधरीलाई हराइदिए उनले यो ऐन अनुसार ५० हजार जरिवानादेखि २ वर्षसम्म जेल सजायसम्म पाउन सक्छन्। उता खाद्य तथा गुण नियन्त्रण विभागले भने अरुणविरुद्ध जिल्ला प्रशासन कार्यालय काठमाडौंमा खाद्य ऐन अनुसार मुद्दा दर्ता गराएको छ। त्यसको पनि अहिलेसम्म टुङ्गो लागिसेको छैन। यो ऐन अनुसार भने उनलाई ५ हजारसम्म मात्र जरिवाना हुने सम्भावना छ।
इको भ्यानको पत्रकार सम्मेलनमा अरुणका छोरा करणले खुस्काएको कुराले होस् वा परीक्षणबाट सर्वोत्तम तेलमा देखिएको अत्यधिक पेरोक्साइड भ्यालुले होस् चौधरी उपभोक्ता ठगेर मोटाएका हुन् भन्ने पुष्टि गरेको छ। यसले चौधरी ग्रुप राजस्व ठगेर मात्र होइन सर्वसाधारणको जनस्वास्थमा खेलेर अकुत अवैध धन कुम्ल्याइरहेको छ भन्ने पुष्टि गरेको छ।
